Shillong, Jymmang, 31: Ka long ka jingjia kaba la pynsuhjer bad kaba la pynpar ñiangkhriat ïa ka shnong ka thaw bad ïa kawei pa kawei ka longïing ha kaba uwei u kpa runar uba la ïap noh ka mynsiem jingïatiplem la suba ba u la dkhat jubor ïa ka jingim jong ki arngut ki khun trai lajong.
Kane ka la jia ha ka Dong Wahktieh, Nongrah Nonglum, ka shnong kaba don ha khapsor jong ka Sor Shillong.
Ïa ka met jong kine ki arngut ki shipara, iwei i kynthei ba dang ar snem ka rta bad u hynmen jong i, u shynrang uba dang saw snem ka rta, la lap na kawei ka jaka khlaw kaba la tip kyrteng kum ka Lawkynti kaba don ha kane hi ka shnong ha kaba la suba ba ïa kane ka kam la leh hi da u kpa jong ki uba la tip kyrteng kum u Jefferson Jana, 29 snem.
Katkum ka jingïathuh jong u Rangbah Shnong, ka shnong Nongrah u Bah B. Pynrope, u la ong ba ka Dorbar Shnong ka la ïoh jingtip halor kane ka jingjia ha ka sngi Baar ha ka por kumba 7:30 baje mynstep.
Shuh shuh u Rangbah Shnong u la ïathuh ruh ba ka Kmie jong kine ki arngut ki khun ka la pyntip ba une u kpa u ju ïalam kai ïa kine ki arngut ki khun manla ka por bad hynin ka Lah Sngi u Blei u la ïalam kai ïa ki kumba ju long ha ka por janmiet.
Namarba ki khun kim shym la wan phai shuh sha la ing haduh ka por mynmiet ki bahaing hasem ki la leit ujor da ka ejahar sha ki Pulit ka Rynjah Police Station ha ka por 11:30 baje mynmiet hadien ba ki la pyrshang ban telephone ïa u Kpa kim shym la ïoh satia namarba u la pynlip noh ïa ka mobile phone, la ïathuh u Bah Pyngrope.
“Hynrei tang ha ka por 8:30 baje eiei, ngi la ïoh ka khubor basngewsih,” u la ong.
“Kum ka shnong ngi sngewsih jur bha halor kane ka jingjia nalor ba ki dei ki khunlung. Ka la ktah bha ïa ngi kum ka shnong. Ngi pynrem jur ïa kane ka jingjia bad ïa u nongleh. Kane ka jingjia kam don shuh ka jingsngewshngaiñ,” la ong u Bah Pyngope.
“Ngin ïatreilang bad ki bor Pulit khnang ban ïohkem ïa une u runar,” u la ong.
Haba kylli, u la ong, “ngi la suba ïoh ba u (Kpa) leh ïa kane ka kam sniew lehse un leh sniew eiei ruh ïalade, hynrei ngi la pyrshang ban wad kylleng ka khlaw hynrei ngim lap dien satia.”
U la pynpaw ruh ka jinglyngngoh ba une u briew u dei u bym pat ju don satia dak sniew hapoh shnong hapoh thaw bad hynnin baroh shi sngi ruh u dang leit bylla.
“Tang shu ïoh jingtip nga la wan mareh mar mar sha kane ka jaka bad kane kan dei ka jingjia kaba nyngkong eh naduh ba nga la bat ïa ka kam kum u Rangbah Dong,” u Bah Shanbor War.
Ha kaba ïadei bad kane ka jingjia, ki Pulit ka nongbah Shillong hapoh ka jingïalam jong u Superintendent of Police (City) u Bah Vivek Syiem kiba la ïoh jingtip na ki bor synshar shnong ki la leit marmar ban pynlong ïa ka jingtohkit kaba bniah bad ban shimti noh ïa ka met jong kine ki arngut shipara ban rah ha NEIGRIHMS Hospital ban pyndep ïa ki jingdonkam katkum ki kyndon jong ka aiñ hashwa ban aiti biang sha ki bahaing hasem na ka bynta ban pyndep ïa ka jinglehniam kaba khatduh.
Ki Pulit kiba la pynlong ïa ka jingtohkit kaba bniah, ki la pynlong ka jingthwet kaba jur ban ïohkem ïa u Kpa.
Tang hapoh khyndiat kynta hadien kane ka jingjia, mynta ka janmiet sngi Baar ki Pulit jong ka nongbah Shillong ki la ïohkem ïa u Kpa na ka shnong Nongrah hadien ka jingthwet kaba jur.
U Superintendent of Police (City) u Bah Vivek Syiem ha ka jingïakren bad u Mawphor lyngba ka telephone u la pynthikna ba ki Pulit ki la ïohkem ïa une u Kpa bad mynta la rah ïa u sha Shillong Civil Hospital na ka bynta ban leh ïa ka Medical Checkup.
U la ïathuh ba ki Pulit kin sa tian bishar ha Kashari ïa u ha ka sngi Balang khnang ban pan jingbit na ka bynta ban ïoh pynlong ïa ka jingtohkit kaba bniah pyrshah ïa u.
