Shillong, Kyllalyngkot 5 : Arngut ki briew la kynnoh ba kila iap na ka jingpynbthei bom dynamite ban tih ña u dewiong na ka par dewiong beaiñ kaba don ha ka shnong Thangsko, East Jaintia Hills District.
Kat kum ka khubor bala ïoh jingtip kham slem, kane ka jingjia ka la jia ha ka 23 tarik Nohprah, kaba la wanrah ruh ïa ka jingmynsaw ïa bun ngut ki nongbylla tih dewiong beaiñ.
Watla ki bor synshar district kim pat pynthikna ïa kaei kaba jia ha kane ka jingjia, ka khubor ka ïathuh ba uwei u briew ba suba u nong Bangladesh, ula iap ha kane kajuh ka sngi.
Katba uwei pat ba la tip kyrteng u Ashok Tamang ula iap hadien ka jingsumar ïa ki jingmynsaw ha Shillong Civil Hospital. Une u briew ula iap ha ka 1 tarik Kyllalyngkot.
Ka khubor ka ïathuh ba kane ka jaka bala tip kum ka nongkynti ‘Sorkari’ ka don ïa bun ngut ki trai kiba tih dewiong beaiñ da kaba ai bylla ïa ki nong Bangladesh. Kane ka dei ka buit ban tep eit miaw namar ïa kine nongbylla lah ban phah leit phai biang sha Bangladesh ha kano kano ka por ba mih kano kano ka jingjia.
La suba ba kito ki briew kiba mynsaw ruh ïa kiba suba jur ba ki dei ki nong Bangladesh, la dep ban phah leit phai ïa ki sha la ka jong ka ri.
