Nongpoh, 16 Nohprah : La suba ba ki don haduh saw ngut ki briew kiba la duh-ei ia la ka jingim na ka daw ka jingkylla ka trok kit dieng na kawei ka khlaw kaba don ha ki thain Mynnar Jirang, Ri Bhoi Sepngi.
Katkum ki khubor ba la ïoh lum na ki katto katne ki briew na Ri Bhoi Sepngi la ong ba kane ka la jia ha kane ka janmiet katba katei ka trok kit dieng ka dang mih na khlaw hynrei ha ka por ba ka dang iaid ha ki surok khlaw ka la kylla noh sha riat. La ïoh jingtip ruh ba nalor kitei ki saw ngut kiba la suba ba ki la khlad noh, uwei pat u la mynsaw jur.
La ïoh jingtip ruh ba ia une u ba mynsaw jur ha katei ka jingkylla ka trok kit dieng la pynkit noh mardor sha Patharkhmah CHC hynrei namar ba la jur palat ka jingmynsaw la rah noh sha Nongpoh Civil Hospital.
Ka jingtip kaba la ïohlum na ki briew kiba sah ha katei ka thain, ki la ong ba kitei ki briew ki dei kiba sah ha ki shnong kiba don ha Ri Bhoi Sepngi.
Shuh shuh la ïoh jingtip ruh ba ka shim por slem bha ban ïoh sei ia kitei kiba ngat ha katei ka jingjia kylla kali namar ka jaka ba katei ka trok ka kylla ka jynjar bha ban ïoh ia ki kali ban leit sei bad ban pynpoi sha Nongpoh Civil Hospital.
