Sub-Junior Girls’ NFC 2025-26: Lyngba ka Dakheinkor khur ka Meghalaya ïa ka jingjop kaba nyngkong

Shillong, Nailar 22: Ka Meghalaya ka la ïoh ban khur ïa ka jingjop kaba nyngkong ha ka Sub-Junior Girls’ National Football Championship 2025-26 hynne ka sngi Thohdieng da kaba pynliem noh da tang 1-0 kol ïa ka Gujarat ha ka jingïalehkai kaba ar jong ki ha ka Group A ha Jorhat, Assam.
Ka Dakheinkor Kharkongor ka la thep ïa katei ka namtam ha ka minit kaba 30, ha kaba ka la shah jied ruh kum ka nongïalehkai kaba kynsai tam ha kane ka jingïakhun (Player of the Match).
Haba phaidien, ka Meghalaya ka la shah rem ha ka jingïalehkai kaba nyngkong pyrshah ïa ka Mizoram ha ka sngi Balang, katba ka Gujarat ka la shah rem da 6-0 kol ha ka Jharkhand.
Dei tang ka kynhun kaba jop na kawei pa kawei na ki saw tylli ki Grpup ki ban rung sha ka semifinal.
Ka jingïalehkai kaba khatduh jong ka Meghalaya kan long pyrshah ïa ka Jharkhand ha ka sngi U Blei ha ka por 3:30 baje nohphai sngi.
Ka kynhun ki thei ïalehkai ka Meghalaya hynne ka sngi:
Jesica Thongni (GK), Anisha Nongsiej (sub Idamon Syiemlieh 87′), Albela Iangjuh, Narisha Khyriem (sub Maya Adella Mawlieh 68′), Phibandamary Nongrum, Venecle Kharmusalman (sub Imandalin Hoojon 87′), Jesica Marthong, Agielity Marngar, Philarisa Nongphud (sub Marley Lhingchamkim 58′), Saralang Lapang, Dakheinkor Kharkongor.