Shillong, Risaw 22: Ka kynhun ïalehkai jong ka Meghalaya kan aireng pyrshah ïa ka Chhattisgarh ha ka jingïalehkai ba nyngkong jong ki ha ka lympung Sub-Junior Boys National Football Championship (Tier 2) ka ban long ha ka 26 tarik Risaw ha Narainpur, Chhattisgarh.
Ka Meghalaya lem bad ka Chhattisgarh, ka jylla ba pdiang bad pynlong ïa kane ka lympung, ki la shah pynngat lang ha kajuh ka thup ryngkat bad ka Himachal Pradesh bad ka Andhra Pradesh ha ka Group C.
Ka kynhun kaba kynthup ïa 20-ngut lem bad ki support staff ki la mih na ka jylla ban leit sha Narainpur hynnin ka sngi.
Ka jingïalehkai kaba nyngkong jong ka Meghalaya pyrshah ïa ka Chhattisgarh ka ban long ha ka 26 tarik Risaw kan sdang ha ka por 3 baje nohphai sngi, nangta yn bud sa ka jingïakhun pyrshah ïa ka Andhra Pradesh, ha ka 28 tarik Risaw, ha ka por 8 shiteng mynstep. Ka jingïalehkai ba khatduh kan long pyrshah ïa ka Himachal Pradesh, ha ka 30 tarik Risaw, ha ka por 8 shiteng mynstep.
Tang ka kynhun ba pyndep ha khlieh duh na kawei pa kawei na ki saw tylli ki Group kin ïohrung sha ka semifinal, kaba pynlong ïa kawei pa kawei ka jingïakhun kaba kongsan bha na ka bynta ki khynnah shynrang ka Meghalaya kiba angnud ban pyni ïa la ka sap ha ki lympung ba kham paw bad ban wanrah burom na ka bynta ka jylla.
Yn ïalam ïa ka kynhun da u Bah Dapmon Tariang uba la shah jied ban long coach, ha ka jingïarap jong u Bah Teibor Dohling kum u Assistant coach.
Ka thup kynhun jong ka Meghalaya ka long:
Goalkeepers: Jordan Adam Kharkongor, Elvin Joe Kharsahnoh, Davidson Lyngdoh Marshillong
Defenders: Damebandon Mawkhroh, Darren Jason Nongpyiur, Ferdinand Kharkrang, Garetbarry Marbaniang, Raphael Aldrich Nongkhlaw, Ronald Vicky Star Wahlang, Marbiang Marwein
Midfielders: Iaishanborlang Khongjee, Kalmilus Marthong, Ksandor Rapsang, Lingson Janal, Macstar Nongkynrih, Manlongkhraw Wahlang, Pynsandame Kharbuli, Samuel Lambha Mawthoh
Forwards: Shiborlang Dkhar, Wanpyndapbor Nongsiej;
Coach: Dapmon Tariang; Assistant Coach: Teibor Dohling; Manager: Kmenlang Shylla; Physio: Elderson Warbah.
