Sub-Junior Boys NFC Tier 2: Bteng jingjop ka M’laya ban ïoh rung sha ka semi final

Shillong, Risaw 30: Ka kynhun ki khynnah ïalehkai jong ka Meghalaya ki la ïohrung sha ka semifinal jong ka lympung Sub-Junior Boys National Football Championship 2025-26 (Tier 2) hadien ba ki la pynliem noh ïa ka Himachal Pradesh da 4-0 kol ha ka jingïalehkai kaba khatduh jong ki na ka Group C, kaba la long ha Narainpur, Chhattisgarh, hynne ka step sngi Palei.
U Marbiang Marwein (8′, 39′, 45’+2) u la pynskhem ïa ka jingjop da kaba thep hat-trick tang ha ka kylla step bad kyntiew ïa ka jingkheiñ jong u sha ka 9 kol ha kane ka lympung. U la pynkut ïa ka jingïalehkai da kaba khur lai sien lynter ïa ka khusnam rangïalehkai ba kynsai lane ka nam ‘Player of the Match’.
kawei pat ka kol jong ka Meghalaya kadei kaba la thep da u Wanpyndapbor Nongsiej (62′).
Da ka jingjop kaba shyrkhei ïa ka Andhra Pradesh (11-0 kol) bad ïa ka Andhra Pradesh (6-1 kol), ka Meghalaya, ba long coach da u Dapmon Tariang, ka la ïoh ban khur pura 9 poiñ da kaba jop lai sien lynter ki jingïalehkai bad buh jaka ha ka semifinal kum ka kynhun kaba wan ha khlieh duh jong ka Group C.
Ka Meghalaya mynta kan khreh ban mad ïa ka jingïakhun kaba kongsan tam ha kaba kan aireng pyrshah ïa ka Telangana ha ka Semifinal kaba nyngkong ka ban long ha ka 01 Naiwieng ha ka por 8 shiteng mynstep. Kumba long ka Meghalaya, ka Telangana, ka la jop lut ïa baroh ki jingïalehkai ha ka Group A ban buh jaka ha ka wat ïakhun knockout.