Shillong, Naiwieng 10: Ka jingïalehkai kaba kyrpang ha baroh ki liang ka la pynlong ïa ka Meghalaya ban khur ïa ka jingjop da 93 ron pyrshah ïa ka Sikkim ha ka jingïalehkai ba nyngkong jong ka U-23 men’s State A Trophy 2025-26 plate group (ka lympung ïalehkai one day) ha Ropar, Punjab, kaba la long ha ka sngi Saitjaiñ.
Ka Sikkim ka la jop ïa ka jingkynting pisa (toss) bad ka la aiti ïa ka Meghalaya ba kan tied nyngkong, ha kaba ka kynhun ïalehkai jong ka jylla ka la lah ba kan kamai 252 shuwa ban hap baroh ki wiket (all out) ha ki 49.4 ober, hynrei ka Sikkim ka la lah ban jubab tang da kaba kamai 159/10 ha ki 38.1 ober.
Baroh lai ngut ki nongtied ba nyngkong jong ka Meghalaya ki la lah ban kynjoh sha ka 40 ron hynrei kim shym la lah pat ban kamai kham bun. U nongtied uba kamai bun ron eh u dei u Dipankar Baruah, da kaba noh synñiang 47 ron na ki 35 tylli ki bol kiba kynthup ïa 7 tylli ki saw ron (fours) bad ar tylli ki six. Katba u Sachin Kumar u la lah ban kamai 43 ron na ki 60 tylli ki bol (8x4s) bad u Josiah Momin 41 ron na ki 63 bol (6x4s). Ha ka jingïatrei lang, u Dipankar bad u Sachin ki la bynrap 86 ron na ka bynta u wiket uba nyngkong.
Na ka liang jong u Manish Sharma ruh, uba dei u kapten jong ka kynhun, u la bynrap katto katne da kaba kamai 38 ron na ki 32 tylli ki bol (4x4s, 1×6), katba u Siddarth u la long u nongkawang bol ba seisoh tam jong ka Sikkim da kaba khur 5 wiket bad ailad tang 32 ron na ki 5.4 ober.
Nangta haba wanphai ha ka pali bol, u Manish u la khur 3 wiket bad ailad tang 28 ron na ki 10 ober, katba ka Sikkim ka la shem jingeh ban tei ïa kano kano ka nongrim kaba khlaiñ ha ka tied. Kiwei pat kiba lah ban khur wiket na ka bynta ka Meghalaya ki long u Denikcheng Marak (2/16 na ki 5 ober), u Shavian Blah (2/25 na ki 4.1) bad u Sachin (2/28 na ki 8 ober).
Hadien kane ka jingsdang kaba bha, ka Meghalaya kan sa ïakhun pyrshah ïa ka Manipur ha ka jingïakhun kaba ar kaban long ha ka sngi Ba-ar ha Mohali. Ka Manipur ruh ka la jop ïa ka jingïalehkai ba nyngkong jong ka, pyrshah ïa ka Arunachal Pradesh da hynñiew wiket, ha ka sngi Saitjaiñ.
