Shillong, Naiwieng 13: Ka kynhun ïalehkai kriket jong ka Meghalaya ka la khur ïa ka jingjop kaba tyngeh da kaba pynliem suk haduh 8 wiket ïa ka Arunachal Pradesh ha ka jingïakhun kaba lai jong ka U-23 men’s State A Trophy 2025-26 plate group (ka lympung ïalehkai one day) kaba la long hynne ka sngi Palei ha Ropar, Punjab.
Ka Arunachal jop ïa ka jingkynting pisa (toss) bad ka la shimti ban tied nyngkong hynrei ka la lah ban kamai tang 79 ron bad hap baroh 10 wiket katba u nongkawang bol spin jong ka Meghalaya, u Gavineal Marpna u la lah ban tyngshaiñ bad seisoh bha ha ka boling. Nangta ka Meghalaya ka la beh ïa kane ka thong kaba duna tang hapoh 21.1 ober da kaba hap tang ar wiket.
Ki don tang arngut ki nongtied ka Arunachal kiba la kynjoh sha ka phew ron, ha kaba u kapten jong ka u Leki Tsering udei uba la kamai bun eh da 25 ron shuwa ba un shah pynhap ha u Gavi, uba la pynkhyllem ruh ïa u Amarjeet Sharma (15), uba wan ba-ar ha ka jingïoh kamai bun ron na bynta ka liang pyrshah. U Manish Sharma (2/19) bad u P.M Santhosh (2/26) ki long kiwei pat ki nongïalehkai ba la ïoh ban pynhap wiket na ka bynta ka Meghalaya.
Ka Meghalaya ka la duh ïa u nongtied ba nyngkong, u Sachin Kumar (0) tang mar ïa sdang ka bol kaba nyngkong eh bud sa u Dipankar Baruah (12) hadien. Hynrei na ka liang u Shavian Blah (36 ron khlem shah pynhap) bad u Pushkar Raj Singh (20 ron khlem shah pynhap) ki la ïalam ïa ka kynhun sha ka jingjop da kaba kamai 47 ron khlem sangeh.
Ka jingïalehkai ban wan jong ka Meghalaya kan long pyrshah ïa ka Nagaland ha ka sngi Saitjaiñ ha Mohali.
