SHILLONG, Nohprah 12: Ki thei ïalehkai jong ka Smit SC ki la lah ban pynjemkhnap haduh 7 – 0 kol ïa ka Nongrim Hills ha ka jingïalehkai na ka Group-B jong ka lympung Shillong Sports Association Women’s Football League 2024, ba la long ha ka sngi Palei (12.12.2024) ha SSA Stadium, Polo. Ha kane ka jingïalehkai ka Makrisha Songthiang ka la long ka namtam da kaba thep haduh 4 kol marwei.
Shuwa kane, ka jingïalehkai kaba nyngkong na ka Group-B la sakhi ïa ka Lumparing SC kaba la jop salit da shi kol ïa ka Rangdajied United FC. Ka shi kol na ka Fragrancy Roiwan ba la thep ha ka 37 minit jong ka kylla miet ka la pynthikna ïa ka Lumparing ban khur pura ïa ki lai point.
Ka jingïakhun kaba bud ka la long hapdeng ki kynhun na ka Group-A, ha kaba ka Madanryting SC bad ka Kharang SC ki la ïasam mar shi point naba ïakhaid haduh kaba kut jong ka por khlem don ba lah pynkhihjar.
Ka jingïalehkai kaba khadduh lah ban ong ba ka la long kaba itynnat tam na kine ki lai tylli ki jingïakhun ha katei ka sngi, ha kaba ka lympung SSA Women’s League ka la sakhi biang ïa ka hat trik kaba ar jong kane ka samoi ba mynta.
Ha kane ka jingïakhun ka Makrisha Songthiang (10, 14, 31 bad 63’minit) ka la ai mynsiem ïa ka kynhun da kaba thep ïa ka hat trik tang hapoh ka kylla step lem bad kawei ka kol ha ka kylla miet. Katba ka Manita Khongsit (17’min) ka la ïoh ban pynkhihjar kawei, nangta ka Rushia Dkhar (33 & 48 min) ka la thep ar kol.
Ka jingïalehkai ka lympung SSA Women’s Football League 2024 ha kane ka sngi Thohdieng (13.12.2024) kan long ha ka por 4 baje janmiet ha MFA Ground, Polo, ha kaba ka Laitkor SC kan ïakhun pyrshah ïa ka Mawpat SC, na ka Group-A.
