SHILLONG, Kyllalyngkot 05: Ka Lumparing SC, Umrynjah SC bad ka New Challenger FA ki la ïoh ban sdang ïa la ki jong ki jong ki jingïalehkai group stage ha ka Shillong Sports Association Women’s Football League 2026 da ka nam jop ha madan First Ground-SSA Stadium, Polo hynne ka sngi Ba-ar (06 tarik Kyllalyngkot).
Ha ka jingïalehkai ba nyngkong la sakhi ïa ka Lumparing SC kaba la pynthikna ban khur ïa ki lai point ba pura da kaba jop 2-0 kol ïa ka Lawei SC ha ka Group B. ïa kine ki ar kol la thep da ka Lishaphulda Khongsit (36’) bad ka Iaphisha Marbaniang (61’).
Kane ka jingjop ka la buh ïa ka Lumparing ha ka kyrdan ba ar ha ka Group-B hadien jong ka PFR FA kaba bat ïa ka kyrdan ba nyngkong da ka jingïapher kol kaba kham bha (+2 la +8).
Ha ka Group A, ka Umrynjah SC ka la wan kyrdan ba ar hadien ba ka la pynliem noh da tang 1 kol ïa ka Mawshubuit SC. ïa kane ka nam tam la thep da ka Aparajita Rabha ha ka minit kaba 49.
Ha ka jingïalehkai ba khatduh, ka shi kol ba la thep da ka Happily Lyngdoh (12’) ka la ïarap ïa ka New Challenger FA ban pynliem ïa ka Kharang SC bad khur ïa ki lai point kumjuh ruh ban wan ha ka kyrdan ba ar ha ka Group C.
Kumba ka long, baroh ki kynhun ki la ïoh ban pyndep mar shi sien ki jingïalehkai lait noh ka Lawsohtun SC, ka ban ïakhun ïa ka jingïalehkai ba nyngkong mynta ka sngi (07.01.2026) pyrshah ïa ka PFR FA. Kane ka jingïalehkai kan long ha ka por 2 shiteng nohphai sngi.
Kane kan dei ka jingïalehkai kaba ar ïa ka PFR FA ha ka Group B, ha kaba ka la sdang ïa ka jingïakhun ba nyngkong da ka jingjop da 8-0 kol ïa ka Mawkasiang SC.
