Shillong, Nohprah 16: Ka kynhun ïalehkai phutbol kynthei jong ka Laitkor SC ka la ïai bteng ban synshar ïa ka Group-A hadien ba jop lai sien lynter ki jingïalehkai jong ka Women’s Football League 2024 ba la pynïaid da ka Shillong Sports Association ha Polo.
Hynne ka lah Sngi U Blei (16.12.2024) ka Laitkor ka la pynliem 5 kol ïa ka Kharang SC ban bat skhem ïa ka kyrdan ba nyngkong na ka Group. Kiba la pynkhihjar na bynta ka Laitkor ki long ka Sanfida Nongrum (24’min), Ribahunkhkhem Kharshing (29 & 30’min), Iaraplang Nongrum (32’min) bad ka Tracy Rympei (38’min).
Shuwa kane, ka jingïalehkai kaba nyngkong jong ka Group-A, la sakhi ïa ka Madanryting SC kaba la khur ïa ka jingjop kaba nyngkong mynta ka samoi da kaba pynliem ïa ka Mawpat SC da 5-1 kol.
Ki san kol jong ka Madanryting la thep da ka Marine Kharkongor (17min), Shemery Rynjah (20’min), Phibajanai Nongsteng (25 & 44’min) bad ka Maidenly Nongbri (59min). Ka Mawpat ka la ïohlad ban pynphai kawei lyngba ka Dahunshisha Syiemlieh (63’min).
Haba phai pat sha ar tylli ki jingïalehkai jong ka Group-B, ka Rangdajied United FC ka la lah ban pynjemkhnap ïa ka Nongrim Hills SC da 6 kol, nangta ka Lumparing SC ka la khur ïa ka jingjop kaba ar sien lynter mynta ka samoi da kaba pynliem ïa ka New Challengers.
Ki 6 kol na ka Rangdajied United FC la thep da ka Inrila-I-Dor khongthaw (6 & 25’min), Eiladki Ksoo (9’min), Eightfullness Shandiar (42 & 57’min), Ideibanri Kharpan (63’min).
Katba ka Marbarin Nongrum (5’min), Iaphisha Marbaniang (16’min) bad ka Fragrancy Riwan (27 & 32’min) ki la pynkhihjar na bynta ka Lumparing SC ban bteng jingjop bad pynliem ïa ka New Challengers.
