SSA Women’s League: Hynriew kol khyrwit ka Nisilia na ka bynta ka Laitkor, jop ka PFR ïa ka Umpling

Shillong, Jylliew 22: Ki ar tylli ki kynhun napoh ka Group A, kiba kynthup ïa ka PFR Academy bad ka Laitkor SC ki la ïoh ban khur ïa ka namjop kaba suk ha ka jingïakhun jong ka lympumg Shillong Sports Association’s Women’s League kaba la pynlong ha madan MFA Turf ha Third Ground, Polo, hynnin ka Sngi Palei.
Na ka liang jong ki thei ïalehkai ka PFR ki la ïoh ban khylliap ïa ka jingïalehkai da ka namjop kaba suk, da kaba pynbam haduh 7-0 ïa ki thei ka Umpling, ha ka jingïalehkai kaba nyngkong, bud sa ka namjop jong ka Laitkor kaba la thep kput haduh 16-0 kol ïa ka Mawkriah West.
Ka kynhun ki thei ka Mawkriah ki la ïakynduh mawsiang lypa shuwa ban jam sha kane ka jingïakhun pyrshah ïa ka Laitkor kaba don ïa ki player kiba tbit, bad kam shimpor katto katne minit ïa ka Laitkor, ka kynhun ba wan ba ar ha u snem 2022 (runners-up) ban pynkhyllem ïa ki bak jong ka Mawkriah.
Ka Laitkor ka la ïoh ban thep ïa shibun ki kol tang hapoh ka 10 minit ba la ïaid ka por jong ka kylla haba nujor haduh da ka kut ka jingïalehkai. Ka Mawkriah ka jin da la shah thep bun kol lymda ym dei na ka jingtbit ka thei ap kol jong ka kynhun, ka Ridalin Kharkongor, kaba la ïoh ban tehlakam ïa katto katne ki kabu ban ïada ïa ka kynhun.
ïa ka namtam ha kane ka jingïakhun ka la leit sha ka Nisilia Majaw, kaba la khyrwit haduh hynriew kol (double hat trick) kaba la ïarap ïa ka kynhun ban khur ïa ka namjop da kaba suk. Ki kol kiba ka la ïoh ban thep ki long ha ka 35′, 41′, 42′, 59′, 63′, 64′, bad bun na kine ki kol ka la ïoh ban thep da ka kjat kadiang.
Shuh shuh, ha kane ka jingïalehkai, ka Tracy Rympei (10′, 19′, 29′) ryngkat bad ka Iaraplang Nongrum (25′, 68′, 69′, 70′, 70’+2) kiba la khyrwit hat trick, katba ka Iawanlang Nongbet (22′) bad ka Ibakordor Wahlang (34′) ki la ïoh ban thep mar shi kol. Kane ka dei ka sien kaba ar na ka bynta ka Laitkor ban khur ïa ka namjop, kumjuh ruh na ka bynta ki thei ka PFR.
Na ka bynta jong ka PFR Academy, ki hynñiew la thep da ka J Lyngdoh kaba la ïoh hat trick (20′, 25′, 46′), ryngkat bad ka B Kharsyntiew kaba la thep ar kol (19′, 70′) bad ka shi kol na ka D Khongwet (21′) bad ka R Suting (51′).
Ka jingïakhun mynta ka Sngi kan long hapdeng ki kynhun na ka Group B – ha kaba ki thei ka Mawlai SC kin ïa aireng pyrshah ïa ka Kharang SC ha ka por 2:30pm, bad ka Iasnohktilang FC kan aireng bad ka Lumparing SC ha ka por 4:15pm.