SSA Women’s Football League 2026 : Bteng jingjop ka Lumparing; buh jaka ka Laitkor ha ka Quarter final

SHILLONG, Kyllayngkot 12: Ka Lumparing SC ka la bteng ïa ka jingjop ba paka jong ka ha ka lympung Women’s Football League 2025 ba la pynïaid da ka Shillong Sports Association, hadien ba ka la pynliem noh da 3-0 kol ïa ka Mawkasiang SC hynne ka sngi Nyngkong ha madan First Ground-SSA Stadium.
Ka Chibasal Sangma (32′) ka la pynkhih ïa ka kol ba nyngkong ha ka kylla step, nangta ka Catherine Kharkongor (69′) bad ka Bahunlang Synrem (63′) ki la bynrap sa ar kol ha ka kylla ban pynthikna ïa ki lai point ba pura.
Kane kadei ka jingjop kaba lai sien lynter ïa ka Lumparing SC ha ka Group-B (kaba don san tylli ki kynhun), bad knieh ruh ïa ka kyrdan ba nyngkong da ka jingïapher kol na ka PFR Football Academy, ka kynhun ba kan sa aireng khatduh ha ka jingïalehkai group stage, ban long la sngi Balang.
Katba ïa ka Mawkasiang SC, kane kadei ka jingïalehkai ba khatduh ha ka Group, ha kaba ka la pynkut ïa ka aïom ba nyngkong ha ka Women’s League da kaba kamai 1 point.
Ha kawei ka prokram ïalehkai jong ka Group-A, ka Laitkor SC ka la pynthikna ïa ka jaka ha ka Quarter final da ka rai jop lyngba ka walkover pyrshah ïa ka Umrynjah SC. Kumta ka Laitkor, ka kynhun kaba bat ïa ka nam lahduh, ka la pyndep ïa ka group stage da kaba kamai 9 point pura naki lai sien ïakhun.
Ha ka Group C, ka Kharang bad ka Nongrim Hills ki la pynkut ïa ka aïom ïalehkai da kaba ïasam mar shi point hadien ba ïakhaid khlem kol.
Ka prokram ïalehkai ha kane ka sngi Ba-ar, ha ka Group A, ka Nongthymmai SC kan aireng pyrshah ïa ka Mawshbuit SC, ha ka por 10:30 baje mynstep, nangta ha ka por 12:30 baje mynsngi ka Rangdajied United FC bad ka New Challenger SC kin ïaknieh ïa ka kyrdan ba nyngkong jong ka Group C.