Shillong, Jylliew 20 : Ka kynhun ki thei ïalehkai kynjat bol jong ka Lumparing SC bad Mawlai SC ki la khur jingjop ha ka jingïalehkai Women Football League 2023 ba pynïaid da ka Shillong Sports Association (SSA). Ha ka jingïalehkai ha ka sngi Ba ar, ka Lumparing SC ka la khur jingjop da kaba pynliem da 6-0 pyrshah ïa ka Kharang SC katba ka Mawlai SC ka la pynliem da 5-0 kol pyrshah ïa ka Ïasnohktilang SC.
Haba phai sha ka jingïalehkai kaba nyngkong, ha madan MFA Third Ground, hapdeng ka Lumparing SC bad ka Kharang SC, ha kaba ka Lumparing SC ka la khr ïa ka jingjop, ha kaba ka I. Marbaniang ka la ïoh ban thep haduh saw kol.
Ïa kitei ki saw kol ka I. Marbaniang ka la ïoh ban thep ha ka minit ïalehkai ba 34, 37, 41 bad 57, katba ka C.Khongwet ka la thep ar kol ha ka minit ïalehkai ba 26 bad 50 minit, katba ka B. Synrem ka la thep shi kol ha ka minit ba 70 jong ka jingïalehkai.
Ha ka jingïalehkai kaba ar, ka Mawlai SC kaba la pynliem da 5-0 kol pyrshah ïa ka Ïasnohktilang SC, ha kaba ki san ngut ki thei ïalehkai ki ïoh ban thep mar shi kol, ba kynthup ka C.Nongtdu (10min), M.Nongrum (13), W.Marweiñ (23), ka M.Songthiang (29) bad ka F.Sympli (58min).
Ka jingïalehkai mynta ka sngi (21-06-2023), ha ka jingïalehkai kaba nyngkong kan long hapdeng ka Kick Start Academy pyrshah ïa ka Laei Smit SC ha ka por 2:30 baje bad ka Synroplang 77 pyrshah ïa ka Maw U Tieng SC ha ka jingïalehkai kaba ar ha ka por 4:15 baje janmiet.
