Shillong, Jylliew 16: Ka Them Rangshken ACC ka la ïoh ban khur pura ïa ki 3 point hadien ba ka la khur ïa ka jingjop da 1-0 kol pyrshah ïa ka Mawlyngad ha ka jingïalehkai ki kynhun na ka Group B jong ka lympung Shillong Sports Association U-20 Fourth Division 2025 ha madan First Ground – SSA Stadium, Polo, hynne ka sngi Nyngkong.
Shuwa kane, ka jingïalehkai hapdeng ka Mawshbuit bad ka Risa Colony, kiba na ka Group-A, ka la kut ha kaba baroh arliang ki la ïasam mar shi point naba ïakhaid da mar 1-1 kol.
U Neban Janong u la pynkhih ïa ka namtam na ka bynta ka Them Rangshken ha ka minit kaba 15 jong ka kylla step kaba la pynthikna ïa ka Them Rangshken ban sdang ïa ka jingïakhun na ka Group B ryngkat ki lai point.
Haba phai sha kawei pat ka jingïalehkai, baroh ar kol ki la wan marïabud hapoh 10 minit, ha kaba ka Mawshbuit ka la ïoh ban lamkhmat nyngkong ha ka minit kaba 66 lyngba u Lurshai Wankhar shuwa ba ka Risa Colony kan jubab da kaba pynïakhaid lyngba u Teilas Marwein (76′).
Ha kane ka sngi Ba-ar kin don lai tylli ki jingïalehkai. Ka Pynthorbah pyrshah kan ïakhun pyrshah ïa ka Lummawbah, na ka Group B, ha ka por 10:30 mynstep, nangta ka jingïalehkai kaba bud kan long hapdeng ka Nongthymmai Nongkynrih pyrshah ïa ka Summit FA, kiba na ka Group C, ha ka por 1:30 mynsngi. Ka jingïalehkai kaba khatduh kan long hapdeng ka Dilingiem pyrshah ïa ka Lapalang, na ka Group C, ha ka por 4:15 jan miet.
