SSA U-20 4th Division: Ha ka khyllipmat shuwa ban wai pynrung semi final u Bajiedlang ïa ka Lummawbah

Jowai, Nailar 03: Ka Lummawbah SC ka la rung sha ka semifinal jong ka lympung U-20 Fourth Division Football League 2025 ba la pynïaid da ka Shillong Sports Association hadien ba ka la pynliem noh da 1-0 kol ïa ka Laitkroh SC ha ka jingïakhun ïa ka Quarter final kaba saw bad kaba khatduh ha madan First Ground jong ka SSA Stadium, Polo, ha ka sngi Saitjaiñ jong ka taïew ba ladep.
Ka shi kol jong u Bajiedlang Rangslang (80’+3 minit) ha ka khyllipmat shuwa ban kut ka por ka la biang pura ïa ka Lummawbah ban weng ïa ka jingdonkam jong ka tie breaker bad khur syndon ïa ka jingjop kaba kongsan.
Haba bishar ïa ka jingïakhun baroh ar tylli ki kynhun ki la duna ha baroh kawei ka jingïalehkai ha kaba ïadei bad ka jinglah ban tehlakam ïa ka bol, ban pynrung bol lane ban thaw ïa ki kabu ba paka hynrei u Bajiedlang u la lah ban pyndonkam hok ïa ka bol ba la pashat nalor shakhmat na ka bynta jong u bad ban shut ïa ka bol. U rangapkol ka la liang pyrshah u la pyrshang ban pynkiar sharud ïa ka bol hynrei u Bajiedlang u la peitngor bha ïa ka kabu bad ula pyndei biang sa shi sien tiak da ka khlieh ïa ka bol shapoh kol.
Kane ka jingjop ka long kaba kongsan ïa ka Lummawbah namar ym tang ba ka la ïohrung sha ka semifinal hynrei ka la pynthikna ruh ban kiew kyrdan sha ka Third Division Football League jong ka SSA na ka bynta ka samoi ban wan.
Kumba ka paw, ka Lummawbah kadei ka kynhun kaba khatduh ban pynthikna ïa ka jaka ha ka semi final. Ki lai tylli kiwei pat ki kynhun ki ban ïakhun ha kane ka wat jong ki saw kynhun ki kynthup ïa ka Lapalang SC, Mawlynrei SC bad ka Mawkasiang SC.
Ki bor pynïaid ki la buh ban pynlong ïa ka Semifinal ha ka 06 tarik Nailar, ha kaba ka Lapalang SC kan ïakhun pyrshah ïa ka Mawlynrei SC, ha ka por 2 shiteng nohphai sngi, nangta ha ka 07 tarik Nailar, hapdeng ka Mawkasiang SC pyrshah ïa ka Lummawbah, 2 shiteng nohphai sngi.