SSA U-20 4th Division 2025: Shah pynshitom ka Laitumkhrah ba sei madan da ki player bym ïahap, ïoh jingmyntoi ei ka Golflink
Shillong, Naitung 21: Ka Laitumkhrah, kaba haduh mynta ka dei kawei na ki kynhun kaba khlaiñ tam ha ka lympung ïalehkai phutbol ‘U-20 Fourth Division 2025’ jong ka Shillong Sports Association, ka la shah pynshitom ha ka SSA namar ba ka la pynmih madan ïa saw ngut ki rangïalehkai ki bym ïahap bad ki kyndon jong ka lympung ha ka jingïakhun ïa ka wat kaba ar (pre quarter final) pyrshah ïa ka Golflink ha ka taïew ba la dep.
ïa kane ka rai la shim da ka Tourmament Committee jong ka Shillong Sports Association, ha ka jingïalang ba kyrpang ba la pynlong ha ka 19 tarik Naitung, 2025, ha ophis treikam jong ka Association, hadien ba ka la mih ka jingujor pyrshah jong ka Golflink SC ïa ka Laitumkhrah SCC ha ka 18 tarik Naitung 2025 (tang mar ïakut ka jingïalehkai ba ka Laitumkhrah ka la jop suk da 4-0 kol ïa ka Golflink).
Ha kane ka jingïalang ka Committee ka la pdiang ïa ka jingpyrshah ba la wan na ka Golflink SC ha kaba ïadei bad saw ngut ki rangïalehkai, ba kynthup ïa u Dabetskhem Rympei, u Mebankhraw Nongrum, u Mebakor Iawphniaw bad u Yeomanry Son Shadap, kiba ka SSA ka la pyntip ha ka rai jong ka ba kim dei satia ban ïoh mih madan ïa ka Laitumkhrah namar kim pat ïoh ïa ka jingkynriah klob (Club transfer) ha ka rukom kaba ju long katkum ka kyndon no. 28 jong ka Football Tournament Rules, Shillong Sports Association.
Kumta ka Tourmament Committee jong ka SSA ka la ai khusnam ïa ka Golflink ban jop da 3-0 ïa ka jingïalehkai ba dang shu dep pyrshah ïa ka Laitumkhrah, kaba lah ban long ka jingmyntoi kaba khraw ïa katei ka kynhun (Golflink) ban ïohrung sha ka wat ïakhun quarterfinal watla kam shym la thep wat tang shi kol ruh ha baroh ar tylli ki jingïalehkai round robin jong ka wat ïakhun pre quarter final.
Ka Laitumkhrah kan ïakhun pyrshah ïa ka Laitlulong ha kane ka sngi Baar bad kan donkam ban jop la kumno kumno da 3-0 kol ïa kane ka jingïalehkai ban ïohrung bad ban leh ïa kane khlem da don ne pynmih madan ïa ki saw ngut ki rangïalehkai ba la kdew haneng, kiba la shah sospon na ki lympung ïalehkai jong ka SSA na ka bynta shisnem namar ka jingïaid lait ïa ki kyndon ha ka jingïalehkai pyrshah ïa ka Golflink ha ka 18 tarik u Naitung.