Shillong, Naitung 14: Ka Laitlulong SC bad ka Lapalang SC ki la ïoh ban sdang ïa ka wat ïakhun kaba ar (round robin jong ka Pre Quarter final) ha ka U-20 Fourth Division 2025 jong ka Shillong Sports Association da ka jingjop, hadien ba ki la pynliem ïa la ki jong ki kynhun liang pyrshah hynne ka sngi Nyngkong ha madan First Ground-SSA Stadium, Polo.
Ka Laitlulong SC ka la pynliem noh ïa ka Golflink SC da 2-0 kol ha ka jingïalehkai kaba nyngkong, nangta ka Lapalang ka la jop pyrshah ïa ka Them Rangshken da 3-1 kol.
Ka Golflink kaba la jop ïa baroh saw tylli ki jingïalehkai jong ka Group A, ka la shah khanglad ban bteng ïa ka jingïaid lynti kaba paka khlem ka namrem ha ka Laitlulong kaba dei jong ka Group D. Baroh ar tylli ki kynhun ki la shah thup ha ka Pool 1, hynrei ha kane ka jingïalehkai dei ka Laitlulong kaba la khur ïa ka jingjop da 2-0 lyngba ki ar kol ba la thep da u Wallamjingsuk Dkhar (27′) bad na u Damewanpli Rani (60′).
Related Posts
Kumjuh ka Them Rangshken kam shym la shah rem ha ka Group B hynrei ka la mad ïa ka namrem da 3-1 kol ha ka Lapalang hynne ka sngi haba ïakhun na ka thup jong ka Pool 2. U Stevenson Sungoh (38′) u la pynkhihjar nyngkong na bynta ka Lapalang, katba u Emineki Pohthmi (49′) bad u Superlative Khongngain (80′) ki la pynbud ïa ki ar kol ha ka kylla miet. Ka shi kol jong ka Them Rangshken la thep da u Wellborn Khyriem (68′).
Lah ban kdew ba kane ka dei ka sien kaba nyngkong ba ka Fourth Division kan pyntreikam da ka wat ïakhun round robin na bynta ka pre-quarterfinal. Hadien ba ladep ki jingïalehkai Group stage mynta ki don sa 12 tylli ki kynhun ba kynsai tam kiba la phiah ha ki saw tylli ki pool kiba don mar lai kynhun. Ki ar tylli ki kynhun ba wan hakhmat duh na kawei pa kawei ka Pool kin ïohrung sha ka quarterfinal.
Ka prokram ïalehkai ha kane ka sngi Ba ar kan long hapdeng ka Mawkasiang pyrshah ïa ka Lummawbah kiba na ka Pool 3, ha ka por 1 baje mynsngi, nangta bud sa ka jingïalehkai hapdeng ka Mawphlang bad ka Laitkroh jong ka Pool 4, ha ka por 4 baje janmiet.