SSA U-14 Football League 2025-26: Jop bun kol ka Langsning FC bad ka Nongthymmai Nongkynrih SC

SHILLONG, Rymphang 01: Ki jingïalehkai jong ka lympung Shillong Sports Association U-14 Football League 2025-26, kiba la long ha ka sngi Saitjaiñ (31.01.2026) ki la poi sha kaba kut ha kaba san tylli ki kynhun ki la mad ïa ka jingjop.
Ha kane ka sngi la sakhi ruh ïa ar tylli ki kynhun kiba la khur ïa ka jingjop kaba khraw da kaba thep bun kol. Kaba nyngkong kadei ka jingjop jong ka Langsning FC haduh 11-0 kol pyrshah ïa ka New Challenger SC.
Ki la don saw ngut ki khynnah ïalehkai jong ka Langsning kiba la thep ar kol, kata u S.Dkhar (10 & 26’), u D.L Nongbri (17 & 19’), D.Syiem (29 & 35’) bad u K.L Lyngkhoi (40 & 48’). ïa ki kol ba dang sah la thep da u E.Mynsong (5’), N.Mukhim (20’), u M. Nongrum Skhembill (58’).
Kumjuh ha ka jingïalehkai ba khatduh ki khynnah ïalehkai jong ka Nongthymmai Nongkynrih SC, ki la pynjemkhnap haduh 10-1 kol ïa ka Diengpasoh SC. U H.Kurbah (9 & 37’), u W.Nongbri (21 & 29’) bad u A.Nongrum (24 & 32’) ki la ïoh ban thep mar ar kol na ka bynta ka Nongthymmai Nongkynrih, katba u C. Kurbah (28’), u M.Kurbah (45’), u H. Warjri (55’) bad u H. ksing (57’) ki la pynkhihjar mar shi sien.
Ka shi kol jong ka Diengpasoh SC la thep da u M. Nongpluid (39’).
Shuwa kane, ka jingïalehkai ba nyngkong kaba la sdang ha ka por 9 baje mynstep la ïohi ïa ka Summit Academy kaba la pynliem noh da 4-1 kol ïa ka Laitkyrhong SC.
Na ka bynta ka Summit Academy la thep da u T. Marshangbai (31’), u R.Syiem (34’), u D.Kharbani (53’) bad u B.Syngkli (58’). Katba u D.Nongkynrih (54’) u la thep ïa ka shi kol jong ka Laitkyrhong SC.
Ha ka jingïalehkai kaba bud ka Umphyrnai SC ka la pynliem noh da 5-0 ïa ka Nongrah SC, ha kaba u B.Kharkongor (24 & 36’) u la noh synñiang ar kol, katba u W.Lyndep (9’), u R.Dkhar (31’) bad u N.Wankhar (49’) ki la pynkhihjar mar shi sien.
Nangta ka Pynthorbah SC ka la jop da 2-1 kol pyrshah ïa ka Mawlai SC. ïa ki ar kol jong ka Pynthorbah SC la thep da u J.Hoojon (25’) bad u L.Nongspung (53’), katba ka Mawlai SC ka la pynïakhaid shi por lyngba u A.Myrthong (28’).
Tang kawei ka jingïalehkai kaba la kut ha ka jingïakhaid da mar 1-1 kol hapdeng ka Sohiong SC bad ka Nongthymmai SC. Ka Sohiong ka la pynkhihjar nyngkong lyngba u L.Malngiang (38’) hynrei ka Nongthymmai SC ka la pynïakhaid lyngba u D R Nongkhlaw (42’).