Shillong, Naitung 18: Ka Lawmali Pyllun SC ka la pynliem noh ïa ka Nongumlong SC da 2-0 kol ha kawei na ki jingïalehkai jong ka lympung phutbol kyrdan Third Division 2025 kaba dang ïaid shakhmat, ba la pynïaid da ka Shillong Sports Association ha madan First Ground-SSA Stadium-Polo, hynne ka sngi Thohdieng.
Ki ar kol ba la thep da u Banganson Nongphlang (45, 63′) ki la biang pura ïa ka Lawmali ban khur pura ïa ki lai point bad ban kamai 4 point naki ar sien ïakhun. Katba kane ka dei ka jingïalehkai kaba nyngkong jong ka Nongumlong mynta ka samoi.
Ka kol kaba nyngkong ka urlong hadien ba u referee u la rai da ka penalty tang shuwa ban kut ka kylla step hadien ba shah pynur uwei na ki rangïalehkai ka Lawmali hapoh phyllaw kol jong ka liang pyrshah. U Banganson u la shimti ïa kane ka kabu ban buh hakhmat ïa ka Lawmali shuwa ba un pynbud ïa ka kol kaba ar ha ka kylla miet.
Ka jingïalehkai ha kane ka sngi Saitjaiñ kan long hapdeng ka Pomlakrai pyrshah ïa ka Sanmer ha ka por 10 shiteng mynstep.
