Shillong, Naiwieng 12: Ar tylli ki klob phutbol ba radbah jong ka jylla Meghalaya, ka Rangdajied United bad ka Shillong Lajong, kin ïa aireng pyrshah kawei ïa kawei pat ban ïaknieh ka burom lahduh ha ka phainal jong ka SSA Super Cup ba nyngkong eh ha kane ka sngi Palei ha madan First Ground-SSA Stadium, Polo. Ka jingïakhun kan sdang ha ka por 5 baje janmiet.
Ha kane ka sngi yn wan kongsan da u Myntri Rangbah ka jylla u Conrad K Sangma ha ryngkat bad u Myntri ka tnad ïalehkai u Bah Wailadmiki Shylla kum u symbud kongsan.
Kine ki ar tylli ki klob ki la ïakynduh pyrshah ha ki lympung ïalehkai bapher bapher, naduh ki lympung kyrdan jong ki samla, haduh ka Shillong Premier League, ka Meghalaya State League, ka Durand Cup bad ka I-League. Ka jingïakhun kaba khatduh hapdeng kine ki arliang ha ka lympung I-League ka dei ha ka samoi 2013-14, kaba sah sa tang ha ka jingkynmaw ha ki nongïalehkai mynta.
Ka jingïakhun hapdeng ka Lajong bad ka Rangdajied ka la bteng naduh katei ka por, watla katta, dei ka SLFC kaba la ïoh mad ïa ka jingjop ha ki jingïalehkai ba ladep, da kaba jop ïa baroh ar tylli ki jingïakhun ha ka SPL 2024 bad kumjuh ruh ha ka MSL bad ka Durand Cup. Hynrei kane ka jingjop kaba shi lynter jong ka Lajong pyrshah ïa ka Rangdajied ka la shah pynsangeh noh mynta u snem ha ka SPL 2025, ha kaba ka jingïalehkai kaba la long ha ka 09 tarik Nailar ka la kut noh ha ka jingïakhaid khlem da don ba lah ban pynkhihjar (0-0).
Ka SSA Super Cup ka lympung ba thymmai ba la pynlong da ka Shillong Sports Association, ka bynrap sa kawei pat ka kyrdan ïakhun ban pynshongshit ïa ki nongkyrshan ba ieid ïa kane ka jingïalehkai, ha kaba hynriew tylli ki kynhun ne ki klob kiba kynsai tam (Top 6) jong ka Shillong Premier League 2025 ki ïakhun ha ka lympung ïalehkai kaba tang shi wait ne knockout.
Ka Langsning, kum ka lahduh jong ka SPL 2025, bad ka Shillong Lajong kaba wan kyrdan ba-ar (runners-up) ki la rung beit beit sha ka semifinal, katba ka Rangdajied bad ka Mawlai ki la hap ban ïakhun lyngba ki playoff ban ïohrung sha ka semi final.
Ka RUFC, kaba la pyndep tang ha ka kyrdan ba san ha ka SPL mynta u snem, ka la pynsngewsih kthang ïa ka Langsning ban jop da 2-0 kol ha ka semifinal ba nyngkong lyngba ki ar kol jong u Stephanson Pale. Hadien nangta ka Lajong ka la lah ban pynliem ïa ka Mawlai da tang 1-0 ha ka SF kaba bud.
Namar ba bun ki nongïalehkai kidei kiba thymmai ka Rangdajied ka la mad jingeh ha ka bynta ba nyngkong jong ka SPL 2025 bad ka la hiar ruh wat ha ka thup kyrdan ban shah sloit (relegation zone) ha ki wat ïakhun ba sdang. Hynrei ka kynhun ka la lah ban ïalehkai bha bad ki la pyndep ha ka rukom kaba khlaiñ da kaba jam shakhmat saw tylli ki jingïakhun khlem da shah rem ban pynthikna ïa ka jaka jong ki ha ka Super Cup. Ka la bteng ïa ka jingïalehkai kaba seisoh jong ki ban pynliem ïa ka Nangkiew Irat da 3-0 ha ka playoff shuwa ban pynkhyllem noh ïa ka lahduh ba thymmai jong ka SPL, ka Langsning.
Ha kawei pat ka liang, ka Lajong ka la paw ba ka kham duna ha ka jingïakhun pyrshah ïa ka Mawlai. U rangap kol jong ki, u Wanteilang Malngiang u la lah ban pyndep hynriew tylli ki jingïalehkai naki 7 tylli ki jingïakhun khlem da shah thep (clean sheet) ha ka SPL bad Super Cup hynrei ka jingduna ka long shakhmat ha kaba ki rangïalehkai kim da don shibun ka buit ban pynkhihjar. Kane ka jingbym lah ban thep kol ka la jia ruh ha ka jingïakhun ba khatduh jong ki ha ka SPL – kaba pynlong ïa ka kynhun ban ïakhaid khlem kol bad ka Nangkiew Irat bad kaba la pynduh shi syndon ïa ka nam lahduh, da kaba aiti noh sha ka Langsning.
