Shillong, Naiwieng 08: Ka Shillong Lajong kan aireng pyrshah ïa ka Rangdajied United ha ka phainal jong ka SSA Super Cup ba nyngkong eh hadien ba ka la pynliem noh ïa ka Mawlai da tang 1-0 kol ha ka semifinal kaba ar, kaba la long ha ka janmiet jong ka sngi Saitjaiñ ha madan First Ground-SSA Stadium, Polo.
Ka kol kaba la long ka namtam ha kane ka jingïalehkai ka dei kaba la kum bakla thep hi da u rangïalehkai ka Mawlai, u Arkibor Makhroh ha ka minit kaba 27.
Shuwa kane, ka Rangdajied ka la jop ïa ka semifinal ba nyngkong pyrshah ïa ka lahduh jong ka SPL 2025 ka Langsning.
Ka SSA Super Cup ka lympung ba thymmai ba la pynlong da ka Shillong Sports Association, ka bynrap sa kawei pat ka kyrdan ïakhun ban pynshongshit ïa ki nongkyrshan ba ieid ïa kane ka jingïalehkai, ha kaba ki hynriew kynhun ne ki klob kiba kynsai tam (Top 6) na ka Shillong Premier League 2025 ki ïakhun ha ka lympung ïalehkai kaba tang shi wait ne knockout.
Ka Langsning, kum ka lahduh jong ka SPL 2025, bad ka Shillong Lajong kaba wan kyrdan ba-ar (runners-up) ki la ïoh jaka ban rung beit beit sha ka semifinal, katba ka Rangdajied bad ka Mawlai ki la hap ban ïakhun lyngba ki playoff ban ïohrung.
Haba phai sha ka Semi Final kaba ar, baroh arliang ka Lajong bad ka Mawlai ki la pynkut ïa ka jingïalehkai da tang shiphew ngut ki rang ïalehkai ha madan. Ka Mawlai ka la mad ïa ka jingshah pynshitom ha ka minit kaba 70 ha kaba u Kevin Rymbai u la shah beh na madan hadien ba u la ïakajia bad u referee (ha ka por ba u la dep ïoh lypa ïa ka yellow card) bad u Banlamkupar Rynjah jong ka SLFC u la ïoh ïa ka yellow card kaba ar namar ka jingpynsep ei kai ïa ka por katba dang shah bujli.
Ka kol ka la wan lyngba ka korner. Watla u Wilbert Marbaniang ka Lajong u la ïoh ban pyndei tiak da ka khlieh ïa ka bol hynrei ka jingpyrshang jong u kan jin da la ïaid lait lymda ka bol kam shym la tyngkhuh ïa u Arkibor uba don shadien jong u Wilbert.
Ka Lajong kan jin da la pynskhem ïa ka jingjop na ka penalty ba ka la ïoh hadien ba u nongapkol ka Mawlai u Lambhamiki Lamare u la pynur ïa u rangïalehkai ka Lajong hapoh phyllaw kol. Hynrei u ne u rangap kol u la lah ban buh sharud ïa ka jingbakla da kaba khanglad ïa ka penalty jong u Mebanaibok Kharbudnah.
Ka Mawlai ka la ïalehkai stet bha hynrei kumba la ju jia bun sien ha kane ka samoi, ka jingduna ha ka rukom pashat bol bad ban pyndep ïa ka kamram ha ki khep ba kongsan kam shym la long kaba janai haduh katta katta. Ha kawei pat ka liang, ka rukom ïalehkai jong ka Lajong ruh kam shym la long kaba janai haduh katta katta – ym shym la don kawei ruh ka liang kaba don ïa u nongïalehkai tur khmat uba seisoh lane ban don ka jingïalehkai kaba khlaiñ ha ka pdeng madan.
Ka SLFC ka la leh ïa kaei kaba ka dei ban leh ban ïada pyneh triang ïa ka kol lamkhmat kaba duna, ha kaba u nongap kol jong ka kynhun, u Wanteilang Malngiang u la ïoh mad biang sa kawei pat ka jingïalehkai khlem da shah thep kol ha ka liang pyrshah – u la shah thep kol tang ha kawei ka jingïalehkai ha kylleng ka SPL bad ka Super Cup mynta u snem katba u la mad hynriew tylli ki jingïalehkai khlem da shah thep (clean sheet). Ha kaba kut u la khur ïa ka khusnam ‘T7 Player of the Match’ ryngkat ka cheque kaba T.5,000 bad ka memento, kaba la aiti da u Vice-President ka SSA, u Bah Cliff Nongrum.
Ka jingïakhun final kan long ha ka 13 tarik Naiwieng ha ka por 5 baje janmiet.
