Shillong, Naiwieng 06: Ka Langsning, kaba dei ka lahduh jong ka Shillong Premier League, kan ïakhun pyrshah ïa ka Rangdajied United ha ka SemiFinal ba nyngkong jong ka SSA Super Cup mynta ka sngi Thohdieng ha madan First Ground-SSA Stadium, Polo. Ka jingïalehkai kan sdang ha ka por 5 baje janmiet.
Ka SSA Super Cup ka lympung ba thymmai ba la pynlong da ka Shillong Sports Association, ka bynrap sa kawei pat ka kyrdan ïakhun ban pynshongshit ïa ki nongkyrshan ba ieid ïa kane ka jingïalehkai, ha kaba ki hynriew kynhun ne ki klob kiba kynsai tam (Top 6) na ka Shillong Premier League 2025 ki ïakhun ha ka lympung ïalehkai kaba tang shi wait ne knockout.
Ka Langsning, kum ka lahduh jong ka SPL 2025, bad ka Shillong Lajong kaba wan kyrdan ba-ar (runners-up) ki la ïoh jaka ban rung beit beit sha ka semifinal, katba ka Rangdajied bad ka Mawlai ki la hap ban ïakhun lyngba ki playoff ban ïohrung.
Haba phaidien, ka Rangdajied ka la pynjot thiaw ïa ka Nangkiew Irat da 3-0 kol ha ka jingïalehkai playoff kaba nyngkong ha ka 31 tarik Risaw shuwa ba ka Mawlai kan pynliem ïa ka Sawmer da 5-4 ha ka tie breaker ha ka sngi ba bud namar ba ïakhaid da mar 3-3 kol wat hadien ka extra time.
Ka Langsning ka la pynjemkhnap ïa ka Rangdajied da 4-0 kol ha ka por ba kine ki arliang ki ïakynduh pyrshah ha ka SPL ha ka 23 tarik Nailar. Hynrei ka RUFC ka la sdang ïa ka samoi jong ka da kaba suki, da kaba jop tang shisien ha ki hynriew tylli ki jingïalehkai ba nyngkong. Kiei kiei ki la nang seisoh hadien kata bad ka Rangdajied ka la pyndep ïa ka samoi ha ka kyrdan ba-san da kaba jop sa arsien ki jingïakhun. Nangta ki la ïaid shakhmat ban pynliem noh ïa ka Nangkiew Irat da kaba suk ha ka playoff ba nyngkong jong ka Super Cup, watla ar tylli ki kol ki dei ba la thep lyngba ka penalty.
Ha kawei pat ka liang, ka Langsning kam pat shym la ïalehkai la katto katne por mynta. Ka dei ka kynhun kaba nyngkong eh ban pyndep ïa ki jingïalehkai ha ka SPL 2025 – ka la ïalehkai ïa ka jingïalehkai kaba khatduh ha ka 14 tarik u Risaw, ha kaba ka league ka la kut tang hadien hynriew sngi. Ha kitei ki hynriew sngi ki la hap ban ap khmih bad kyrmen ba ka resol jong ka Lajong bad ka Mawlai kan ïaid kumba ka kwah bad ka resol ka la ïaid thik kumba ka Langsning ka donkam, ha kaba ki la pyndep da kaba khur 20 poiñ ban tam ïa ka Lajong bad ka Mawlai, kiba la kamai mar 19 poiñ.
Watla ka la long jar jar ha kiba bun ki bynta jong ka SPL 2025, hynrei ka Langsning ka la ïalehkai bha ban pyndep ïa ka samoi ha ka kyrdan ba ha khlieh duh. Ki la jop lynter saw tylli ki jingïalehkai bad ki la shah rem tang shisien ha ki khyndai sien ïakhun.
Ha kane ka sngi Saitjaiñ ka Lajong bad ka Mawlai kin ïa aireng ha ka semifinal kaba ar, kane ruh ha ka por 5 baje janmiet. Ka Lajong ka khlem shah rem ha ka SPL 2025 hynrei ka la jop tang san sien, ha kaba saw tylli ki jingïalehkai ka la ïakhaid, kaba pynlong ïa ka ban duh ïa ka nam lahduh. Kawei na ki jingjop ba kyrpang jong ki ka long pyrshah ïa ka Mawlai ha ka 01 tarik u Risaw. Ha kane ka jingïalehkai ka Mawlai ka la lamkhmat da 3-0 kol tangba ka Lajong ka la wanphai ban pynkhihwin bad khur ei ïa ka jingjop da 4-3 ha ka rukom kaba itynnad.
Katei ka jingshah rem ka la pynkyndit ïa ka Mawlai bad ka pyni ba watla ka long kaba khlaiñ, hynrei kam dei kajuh ka kynhun kaba la rah ar sien lynter ïa ka SPL ha u snem 2022 bad 2023 bad kumjuh ruh ka kynhun kaba la rah nam lahduh jong ka Meghalaya State League ha u snem 2024. Wat hapdeng katei ka jingshah rem ka Mawlai ka dang don ha ka jingïakhun na ka bynta ka nam lahduh hynrei ka jingïakhaid ha kaba kut jong ka samoi pyrshah ïa ka Rangdajied ka la pynkut noh ïa kata ka jingkyrmen bad ka la long kumba ka la aiti noh ïa ka burom sha ka Langsning.
Lah ban ong ruh ba ka Mawlai ka la duna ha ka jingïalehkai pyrshah ïa ka Sawmer, kaba la wanrah ïa ka jingïakhun kaba jwat ha baroh kawei jong ki 120 minit, ha kaba tang kawei ka penalty kaba la shah khanglad ka la pynïakhlad ïa kine ki arliang ha kaba kut.
