SHILLONG, Risaw 10: Ka Marbisu SC ka la lah ban pynliem noh ïa ka Lumshyiap SC da 3 kol ha ka lympung phutbol Second Division 2024 ba la pynïaid da ka Shillong Sports Association ha ka sngi Palei (10.10.2024), ha SSA Ground, Polo.
Ki ar kol na u Bankitkupar Marbaniang kiba u la thep ha ka 33 bad 90+4 minit, bad nangta ka shi kol na u Arnesstar Kharpuri (66 min) ka la pynthikna ïa ka Marbisu ban khur pura ïa ki lai point kiba kongsan.
Da kane ka namjop ka Marbisu ka la ïoh ban bat kyrdan ba san na ka Group-B, da 6 point naki san sien ïakhun, katba ka Lumshyiap ha ka kyrdan ba 6 da 4 point naki hynriew sien ïalehkai.
Shuwa kane, ka jingïalehkai hapdeng ka Laitlyngkot SC bad ka Nongkrem SC ka la poi sha kaba kut da ka jingïakhaid, ha kaba ym shym la don ba lah ban pynkhihjar. Kane ka mut ba baroh arliang ki la ïasam mar shi point.
Ka Nongkrem ka dang ïaineh ha khliehduh da 13 point naki san sien ïakhun.
