SSA Fourth Division: Jemkhnap ka Mawreng SC ha ka Umrynjah SC

Shillong, Naitung 01: Ka Umrynjah SC ka la khur jingjop ha ka jingïalehkai kaba la long hynne ka Lah Sngi U Blei jong ka lympung SSA Forth DIVISION 2024, katba ka Lummawbah SC bad ka Mawkasiang SC ki la ïasam mar shi point naba ïakhaid.
Hynne ka Sngi la thmu ban pyndep lai tylli ki jingïalehkai hynrei la hap ban pynkynriah noh ïa ka jingïakhun hapdeng ka Madanryting SC pyrshah ïa ka Lumpyngngad SC kaba la pynbeit ban sdang ha ka por 1:45 mynsngi namar ki daw bym lah kiar.
Ki jingïalehkai ba la long hynne ka Sngi ki la sdang ha kajuh ka por, kata 4 baje nohphai sngi, kawei kaba la pynïalehkai ha SSA Ground katba kawei ha madan lehkai jong ka MFA, Polo.
Haba phai sha ka jingïakhun hapdeng ka Lummawbah SC bad ka Mawkasiang SC ha SSA Stadium, ka jingïalehkai ka la kut ha ka jingïakhaid, ha kaba baroh ar kynhun ki la ïoh ban thep mar shi kol.
Dei ka Mawkasiang SC kaba la pynkhihjar nyngkong lyngba u Donald Suting ha ka 17 minit hynrei ka Lummawbah SC ka la pynphai ïa ka jubab ha ka 58 minit lyngba u Andreve Maring, kaba la pynlong ïa kine ki ar kynhun ban ïasam mar shi point.
Ka jingïakhun kaba ha MFA Ground, ka la kut ha kaba ka Umrynjah SC ka la pynjemkhnap ïa ka Mawreng SC haduh 6 kol ban khur pura ïa ki lai point ba kongsan.
Ar ngut ki player ka Umrynjah SC ki la ïoh ban pynkhihjar ar sien, kata u Wanborlang L Nongbri (11 & 51 min) nangta u Damiatlang Rumnong (20 & 23 min), katba u Jeremaiah Rani (26 min) bad u Bashemphang Nongkhlaw (58 min) ki la ïoh mar kawei.
Mynta ka sngi (02 tarik Naitung, 2024) ka jingïalehkai kaba nyngkong kan sdang ha ka por 1:45 baje mynsngi, ha SSA Ground, ka jingïakhun kan long hapdeng ka Umiew Maw U Sam pyrshah ïa ka New Challenger SC.
Nangta ka jingïakhun kaba ar ha ka por 4 baje nohphaisngi, ha SSA Ground, hapdeng ka Nongthymmai Raitnongkynrih SC pyrshah ïa ka Mawlynrei SC. Katba ka Mawnianglah Youth SC kan aireng pyrshah ïa ka Mawpdang SC ha kajuh ka por ban long ha MFA Ground.