SHILLONG, Naiwieng 11: Ka Malki ka la ïoh ban khur pura ïa ki lai point hadien ba ka la jop ha ka jingïalehkai ka lympung First Division Football League 2024 jong ka Shillong Sports Association kaba la long ha ka Lah Sngi U Blei (11.Naiwieng.2024) ha madan First Ground – SSA Stadium, ha Polo.
Katba ka jingïakhun kaba bud la sakhi ïa ka Lawsohtun SC kaba la lah ban wanphai nadien ban ïakhaid bad ka Sohryngkham SC bad pynthikna sam mar shi point.
Haba phai sha ka jingïalehkai kaba nyngkong, ka Malki SC ka la ïoh ban lamkhmat ïa ka Mylliem SC da shi kol ha ka kylla step lyngba ka kol na u Lamphrang Kharbuli (37 min), hynrei ka Mylliem ka la jubab da kaba pynïakhaid ha ka 59 minit lyngba u Kevin Kurkalang.
Naduh kane ka por baroh arliang ki la shem shitom ban ïoh pynkhihjar hynrei ha ka khyllipmat ba la khmihlynti ba kane ka jingïakhun kan kut ha ka jingïakhaid, u Fashioning Syngkli (84min) u la pynkhih ïa ka kol pynjop na bynta ka Malki SC ban khur pura ïa ki lai point.
Haba phai pat sha ka jingïakhun kaba ar, ka Sohryngkham SC bad ka Lawsohtun SC ki la ïakhaid da mar 2 kol.
Ka Sohryngkham ka la sngew shngaiñ hadien ba lamkhmat haduh 2 kol ha ka kylla step, kiba la pynkhih da u Wallambha Kharpran (13 & 17 min), hynrei ka jingthmu jong ka kynhun ban khur pura ïa ki lai point la shah khanglad noh ha ka kylla miet, ha kaba ka Lawsohtun ka la pynïakhaid lyngba u Blasha Nongkynrih (76min) bad u Rangdajied Rynjah (78min).
Ki jingïalehkai ka lympung First Division ha kane ka sngi Hatmajai (12.11.2024),ha ka por 12 shipawa ka Umphyrnai SC kan ïakhun pyrshah ïa ka Mawkhar SC, nangta ha ka por 3 shipawa kan long hapdeng ka Nongkseh SC pyrshah ïa ka Pohkseh SC.
