SSA Champions Cup 2025: Sdang ka Langsning da ka jingjop ïa ka Umlyngka; ïakhaid ka Mawkasiang bad ka Mylliem Lum

Shillong, Naiwieng 24: Khatduh khatwai ka jingap khmihlynti ïa ka lympung ïalehkai phutbol ba thymmai kaba la tip da ka ‘SSA Champions Cup 2025’ ka la urlong hynne ka sngi Nyngkong da ar tylli ki jingïakhun jong ki kynhun ha ka Group-A ha madan First Ground-SSA Stadium, Polo.
Kane ka lympung ka la sdang da ka jingïakhun hapdeng ka Mawkasiang pyrshah ïa ka Mylliem Lum ha ka por nohphai sngi kaba la kut noh ha ka jingïakhaid da mar 1-1 kol. Katba ha ka jingïalehkai kaba bud la ïohi ïa ka Langsning kaba la hap ban mad ïa ka jingïakhun kaba jwat shuwa ba kan jop da 2-0 kol pyrshah ïa ka Umlyngka ha ka por janmiet.
Ka jingmut jong ka Shillong Sports Association da kaba pynlong ïa kane ka lympung ka long ban pynïasoh lang ïa ki kynhun lahduh bad kiba wan kyrdan ba-ar (champions & runners up) jong ki san tylli ki Football Division ka SSA ha kawei ka lympung kaba kham kloi bad kaba itynnad bha. Kane ka lympung kan don 10 tylli ki klob kiba la phiah ha ki ar tylli ki Group ba mar san tylli, bad kin ïakhun markylliang shisien, ha kaba ki ar kynhun kiba wan hakhmat eh na kawei pa kawei ka Group kin rung sha ka semifinal.
U Wanshwadame Diengdoh (78’) bad u Donlad Diengdoh (84’) ki la pynkhihjar na ka bynta ka Langsning ban khur ïa ka jingjop. Ha kawei pat ka liang, ka Mawkasiang ka la thep lyngba u Edmon Marngar (23’) shuwa ba ka Mylliem Lum kan pynïakhaid lyngba u Eliastar Nongsiej (30’).
Ka Langsning, lahduh jong ka Shillong Premier League, kan jin da la pyrkhat ban jop suk haba ïakynduh pyrshah ïa ka Umlyngka, kaba wan ba ar ha ka Third Division. Ha ka kylla step, ka Langsning ka la ïoh ban tehlakam bun shah ïa ka bol ha pdeng madan bad kumta ka la ïoh ban thaw bun tylli ki kabu hynrei u Babitlang Wahlang, u nongap kol ka Umlyngka, u la long uba la pynkhreh bad u khlem la ailad satia ïa ki jingpyrshang ban ïaid lait.
Ka jingïakhun ka la long kaba kham ïaryngkat bor ha ka kylla miet, ha kaba ka Umlyngka ruh ka la pynmih katto katne ki jingpyrshang ban tur shakhmat hynrei ym don kawei na kine ka ban wanrah jingma bad u nongap kol jong ka Langsning u Rajat Paul Lyngdoh u la shah tynjuh tang ha ki katto katne ki khep.
Dei ha ka minit kaba 78 ba ka Langsning ka la ïoh ban pynurlong ïa ka kol kaba nyngkong lyngba u Wanshwadame. Ka Umlyngka ka la pyrshang ban wanphai hynrei ka kol kaba ar na u Donlad ka la pynkut noh ïa ka jingïakhun.
Shuwa kane, ka Mawkasiang, kaba dei ka lahduh ha ka Fourth Division, ka la ïalehkai bha da kaba mih madan ryngkat bad san ngut ki nongïalehkai ba la shim wai (katkum ka jingkheiñ ba ka SSA ka la ailad na ka bynta kane ka lympung) na ka kynhun SPL ka Mawlai.
Uwei na kine ki rangïalehkai ba la shim wai, u Fairming Suting u la noh synñiang na ka bynta ka kol jong ka Mawkasiang lyngba ka bol pashat kaba thikna na ka liang kadiang kaba u Edmon u shu donkam ban pyndei tiak ban pynrung shapoh kol.
Hynrei na ka liang ka Mylliem Lum, lahduh ha ka Second Division, ka la nang pynkhlaiñ ruh ïa la ka jong ka kynhun da ki nongïalehkai ba la shim wai (on loan) bad ki la don bynta ban thombor ïa ka Mawkasiang baroh shilynter ka kylla step, da kaba ïoh saw tylli ki korner ha ki 15 minit ba nyngkong. Kim shym la lah ban thep kawei na kine hynrei u Eliastar, uwei na ki nongïalehkai jong ki ha ka Second Division, u la lah ban thep ïa kawei pat hadien shiteng kynta ba la ïaid ka kylla step ban pynïakhaid.
Ha kane ka sngi Ba-ar kin don biang ar tylli ki jingïalehkai ban sdang ïa ka Group B. Ha ka jingïakhun kaba nyngkong, ha ka por 1 baje nohphai sngi, ka Nongkseh, lahduh ha ka First Division, kan ïakhun pyrshah ïa ka Laitkyrhong kaba wan ba ar ha ka Second Division. Hadien kane yn bud sa ka jingïakhun jong ka Shillong Lajong, kaba wan ba-ar ha ka SPL, pyrshah ïa ka kynhun lahduh ha ka Third Division ka Mawkriah West ha ka por 4:30 baje janmiet.