SSA Champions Cup 2025: Pynthikna ka Nongkseh ïa ka jaka ha ka semi da kaba ïakhaid bad ka Lajong; jop ka MLP

Shillong, Nohprah 04: Ka Shillong Lajong bad ka Nongkseh ki la pynshongshit ïa ki hajar ngut ki nongkyrshan kiba la tuid ha SSA Stadium, Polo ha ka janmiet jong ka sngi Palei da ka jingïalehkai kaba itynnat hapdeng jong ki ha ka lympung SSA Champions Cup, kaba la kut noh ha ka jingïakhaid da mar 1-1 kol.
Kane ka jingïakhun jong ka Group B ka dei ka jingïakhun kaba sahnam hapdeng ka klob kaba seisoh tam na Shillong ha kine ki snem ba la dep (Lajong) pyrshah ïa ka kynhun liang pyrshah ba thymmai (Nongkseh) kaba la pynliem lut ïa baroh kiba ka ïakynduh ha lynti shuwa kane ka sngi.
U Kynsaibor Lhuid (67’) u la pynkhihjar nyngkong na ka bynta ka Nongkseh hashwa ba u Deibormame Tongper (76’) un pynïakhaid ïa ka Lajong.
Watla ki nongkyrshan kiba shitrhem jong ka Nongkseh kin jin da la sngewdiaw ba ka jingjop ba 11 sien lynter ha ki jingïalehkai jong ka klob ha kylleng ka First Division bad ka Champions Cup ka la poi sha kaba kut, hynrei ka jingïakhaid ka la biang ïa ka Nongkseh ban ïohrung sha ka semifinal.
Na ka bynta ka Lajong kaba la dep rung lypa sha ka semi final shuwa ban jam sha kane ka jingïakhun, kane ka dei ka jingïalehkai kaba 15 sien lynter khlem shah rem, haba kyllum lang baroh ki jingïalehkai jong ka Lajong naduh ka Shillong Premier League, ka SSA Super Cup bad mynta ka Champions Cup. Kane ka jingïakhun ha kane ka janmiet ka dei ruh ka sien kaba nyngkong ba baroh arliang mamla ki la shah thep kol ha kane ka lympung.
Lah ban kdew ba kane ka jingïakhun ka long kaba khraw bha na ka bynta ka Nongkseh, kaba la tei ïa ka kynhun da ki rangïalehkai kiba tbit mynta ka samoi ha ka jingpyrshang ban ïa aireng pyrshah ïa ki klob kiba kynsai tam. Hynrei ban pynliem ïa ka Lajong – kaba la wan ba ar ha ka SPL 2025 bad ka lahduh ha ka Super Cup – ym shym la don mano mano ruh ba lah ban pynurlong ha kane ka samoi naba ka Lajong ka la ïai bteng ban pynpaw ïa ka mynsiem ïakhun kaba khlem kynran dien katba dang sah ka por.
Ha kawei pat ka jingïakhun, ka Meghalaya Police ka la pynliem ïa ka Mylliem Lum da 3-0 kol ban pynskhem ïa ka kyrdan ba nyngkong ha ka Group A. U Chesterfield Nongdhar (3’, 54’) u la pynkhihjar ar sien katba kawei pat la thep da u Balmingstar Lyngkhoi (36’).
Shuwa ban jam sha kane ka jingïakhun ka MLP ka ladep ban pynthikna lypa ïa ka jaka ha ka semi final, bad kane kadei ka jingjop kaba lai, bad mynta ka la ïoh 10 poiñ.
Kan don tang kawei ka jingïakhun ha kane ka sngi Thohdieng, kata hapdeng ka Mawlynrei pyrshah ïa ka Laitkyrhong ha ka por 2:30 baje nohphai sngi ha ka Group B. Namar ka jingïakhaid mynta ka sngi, ka Laitkyrhong kam don lad shuh ban rung sha ka semifinal, kumta kane kan long tang ka jingïakhun ban pyndep rukom bad ban pynbeit mano ban pyndep ha ka kyrdan kaba lai.