SSA Champions Cup 2025: Pynthikna ka Langsning ïa ka SF pyrshah ïa ka Nongkseh hadien ba pynliem ïa ka Mawkasiang

Shillong, Nohprah 07: Ki jingïakhun Semifinal ha ka lympung ‘SSA Champions Cup 2025’ ki la biang pura hadien ba ka Langsning ka la wanrah ïa ka jingïalehkai kaba bha tam ban jam shakhmat da kaba pynliem noh ïa ka Mawkasiang da 6-0 kol ha ka jingïalehkai group stage ba khatduh ha madan First Ground-SSA Stadium, Polo, ha ka janmiet jong ka sngi Saitjaiñ (06 tarik Nohprah, 2025).
Kawei pat ka jingïalehkai ha kane ka sngi la sakhi ïa ka Nongkseh kaba la pynliem noh ïa ka Mawkriah West da 6-1 ha ka Group B.
Ka jingjop bun kol jong ka Langsning ka la pynlong ïa ka ban kiew sha ka kyrdan ba nyngkong ha ka Group A, da kaba ïaryngkat mar 10 poiñ bad ka Meghalaya Police hynrei mynta da ka jingïapher kol kaba kham bha (da +10 la +7). Katba ka Nongkseh, ka la donkam ban thep ym duna ïa ka khyndai (9) kol ban ïoh kam ïa ka kyrdan ba nyngkong ha ka Group B hynrei ka la hap ban hun ïa ka kyrdan kaba ar hadien ka Shillong Lajong, sa shisien pat namar ka jingïapher kol (+16 la +13).
Kumta ka Langsning bad ka Nongkseh kin ïakynduh ha ka semifinal ba nyngkong ha ka sngi Ba-ar, katba ka Lajong kan ïakhun pyrshah ïa ka MLP ha ka sngi Balang. Baroh ar tylli ki jingïalehkai kin sdang ha ka por 4:30 janmiet.
Ka Mawkasiang kan jin da la ïoh rung sha ka knockout lada ka la lah ban pynliem ïa ka Langsning, hynrei ka lahduh jong ka Shillong Premier League ka la paw ba ka kham khlaiñ naduh kaba sdang. Ha kane ka jingïakhun ki la ïoh ban thep kham bun kol ban ïa ki lai tylli ki jingïalehkai ba la dep lada kheiñlang bad kane kam dei satia namar ka jingduna na ka liang ka Mawkasiang hynrei tang na ka daw jong ka jingtbit jong ka Langsning.
U Nelson Rymbai (32’) u la ïoh ban thep nyngkong eh ïa ka kol na ka bynta ka Langsning, nangta u Donlad Diengdoh (40’, 64’, 82’) u la lah ban thep ïa ka hat-trick ban ai bor shuh shuh ïa lade shuwa ban jam sha ka semifinal, katba u Samuel Phawa (55’, 60’) u la thep ar tylli ki kol da khlieh.
Shuwa ïa kane, ki rangïalehkai kiba la pynkhihjar na ka bynta ka Nongkseh ki long u Chesterpaul Lyngdoh (23’, 55’), Kitboklang Pale (25’), Khrawkupar Jana (65’), Kynsaibor Lhuid (68’) bad u Baiaikara Swer (84’), katba u Khainkupar Iawphniaw (79’) u la ïoh ban pynphai kawei na ka bynta ka Mawkriah West.
Watla ki saw tylli ki kynhun kiba khlaiñ tam na ki 10 tylli kiba la ïakhun ha ka Champions Cup ki la rung sha ka semi, hynrei ym lah pat ban kyntait ba ki klob na ka Second, Third bad Fourth Division ki la ai katto katne ki khyllipmat kiba sah jingkynmaw bad ym lah lait ba ki nongïalehkai kin sa ïoh jingmyntoi na kaba ïalehkai ryngkat bad pyrshah ïa ki katto katne ki nongïalehkai ba la kham tbit jong ka jylla lyngba kane ka lympung.
Mynta baroh ki khmat kin phai sha ka knockout ha kaba ki ar tylli ki klob SPL ki la rung sha ka semi da kaba wan ha khlieh duh ha ki Group jong ki, katba ki arliang mamla na ka First Division ki la pyndep ha ka kyrdan ba ar (runners-up). Lai na kitei ki saw tylli ki kynhun ki la dep ban ïoh mad ïa ka nam lahduh ha ki lympung ka SSA mynta u snem – ka Langsning kum ka lahduh ha ka SPL, ka Lajong ha ka SSA Super Cup bad ka Nongkseh kum ka lahduh jong ka First Division.
Ki klob First Division ki la dep pynpaw ba ki lah ban ïa aireng kumba long ki kynhun kiba don ha ka SPL, ha kaba ka MLP ka la ïakhaid bad ka Langsning da 1-1 ha ka group stage, kumjuh ruh ka la jia ha ka jingïalehkai hapdeng ka Lajong bad ka Nongkseh.
La khmih lynti ba ka jingïakhun kan nang jur shuh shuh katba ki saw tylli ki kynhun kiba kynsai tam mynta kin ïa aireng ha ka semi final ha ka jingïaknieh ban ïoh ïa ka khusnam ba khatduh.