SSA Champions Cup 2025: Pynthikna ka Lajong ban ïohrung semi final; ïakhaid ka MLP bad ka Langsning

Shillong, Nohprah 02: Ka Shillong Lajong ka la kylla long ka kynhun kaba nyngkong ban ïohrung sha ka semifinal haka SSA Champions Cup 2025 hadien ka jingjop da 2-0 kol ïa ka Laitkyrhong ha madan First Ground-SSA Stadium, Polo, hynne ka sngi. Hadien lai tylli ki jingïakhun, ka SLFC ka la kamai 9 poiñ pura bad lamkhmat ïa ka Group B.
Ha ka jingïalehkai kaba bud, ka Langsning bad ka Meghalaya Police ki la ïakhaid da 1-1 ha ka Group A. Ka MLP ka la lamkhmat ïa ka Langsning ha ka miej poiñ katkum ki kol ba la thep (8 la 5) namar ba baroh ar ki ïakatjuh ka jingïoh poiñ (7) bad ka jingïapher kol (+4).
U Iohborlang L Lyngkhoi (69’) bad u Babysunday Marngar (74’) kidei ki rangïalehkai kiba la pynkhihjar na ka bynta ka Lajong. Ha kawei pat ka jingïakhun, u Everestarly Rynjah (12’) u la pynkhihjar na ka bynta ka MLP shuwa ba u Manbhalang Nongmin (30’) un pynïakhaid na ka bynta ka Langsning.
Ka jingïakhaid ka dang iehnoh ïa ka lad ïa kiwei pat ki kynhun ha ka Group A, ha kaba ka Mawkasiang ka long kaba don jingkyrmen. Kin ïalehkai pyrshah ïa ka Umlyngka ha kane ka sngi ha ka por 1 baje nohphai sngi. Nangta ha ka Group B, ka Mawlynrei bad ka Mawkriah West kiba dang wad ïa ki poiñ ba nyngkong kin ïakhun ha ka por 4:30 janmiet.