SSA Champions Cup 2025: Pynjemkhnap ka Nongkseh ïa ka Mawlynrei; jop ka Umlyngka ïa ka Mylliem Lum

Shillong, Nohprah 01: U Chesterpaul Lyngdoh u la thep hat-trick ha ka jingjop kaba shongkun jong ka Nongkseh da 7-0 kol pyrshah ïa ka Mawlynrei ha ka Group B ha ka lympung SSA Champions Cup 2025, kaba la long ha ka janmiet jong ka Lah Sngi U Blei ha madan First Ground-SSA Stadium, Polo.
Kawei pat ka jingïakhun jong kane ka sngi, ha ka Group A, ka Umlyngka ka la pynliem ïa ka Mylliem Lum da tang 1-0 kol. U Samborwell Nongbsap u la thep ïa ka namtam na ka bynta ka Umlyngka ha ka minit kaba 67. Ka jingïakhun kaba kham hadien, u Chesterpaul (40’, 45’+3, 58’), u Kitboklang Pale (51’, 53’), u Hardy Cliff Nongbri (63’) bad u Gerrard Dakerlang Sun (84’) ki la pynkhihjar ban ai ka jingjop kaba khraw ïa ka Nongkseh.
Baroh ar tylli ki jingïalehkai ki long kiba kongsan bha haba bishar ïa ka jinglong jingman ki kyrdan hala ki jong ki Group. Da tang ar tylli ki kynhun kiba wan hakhmat duh na kawei pa kawei ka Group kin rung sha ka semifinal, ka jingshah rem kaba arsien ha ki lai tylli ki jingïakhun ka la pynlong ïa ka Mylliem Lum ban khyllem noh na ka jingïaknieh rung. Ka Umlyngka kaba la duh lypa hadien ba ka la shah rem ha ki ar tylli ki jingïalehkai ba nyngkong, kane ka jingjop ka long kum ka jingpyntngen hynrei ka la kiew ruh sha ka kyrdan kaba lai ha ka Group A.
Ha ka Group B, ka jingjop ka la pynskhem ïa ka Nongkseh ban bat ïa ka kyrdan kaba ar, watla ym pat pynthikna ïa ka Top 2 na ka bynta jong ki. Katba ka jingshah rem ka la pynlong ïa ka Mawlynrei ba kan hiar sha ka kyrdan kaba saw ha ka Group hadien ka Mawkriah West.
Ki jingïalehkai ha kane ka sngi Ba-ar, ka Laitkyrhong kan aireng pyrshah ïa ka Shillong Lajong ha ka Group B ha ka por 1 baje nohphai sngi, bud sa ka jingïakhun hapdeng ka Langsning pyrshah ïa ka Meghalaya Police ha ka Group A ha ka por 4:30 baje janmiet.
Ka Laitkyrhong ka donkam la kumno kumno shi point ban pynneh ïa ka jingkyrmen jong ki ban ïaknieh rung sha ka semifinal, katba ka jingïakhun hapdeng ka Langsning bad ka MLP ka dei ka jingïakhun kaba khraw hapdeng ki ar tylli ki kynhun ba khlaiñbor ha ka Group A.