SHILLONG, Naitung 17: Ar tylli ki kynhun ba kynthup ïa ka Pynthorbah SC bad ka Laitkroh SC ki la khur jingjop ha ki jingïalehkai kiba la long hynne ka sngi ha ka lympung Shillong Sports Association Fourth Division 2024, ha SSA Ground, katba ka jingïalehkai kaba nyngkong eh ka la kut ha ka jingïakhaid.
Ha ka jingïakhun kaba nyngkong la sakhi ïa ka Umrynjah SC bad ka Thynroit SC kiba la ïasam mar shi point naba ïakhaid khlem don ba lah ban pynkhihjar.
Ha ka jingïalehkai kaba bud, ka Pynthorbah ka la lah ban khur ïa ka jingjop da kaba pynliem ïa ka Mawklot SC da 2-1 kol.
Ka Mawklot SC ka la ïoh ban lamkhmat nyngkong ïa ka jingïakhun lyngba ka kol na u Mebanpynshngain Lyngdoh (14min) hynrei ka Pynthorbah ka la jubab na ka kol u Raymond Kharkongor (29min) ban pynïakhaid shuwa ba u Ronald P Lynting un pynkhih ïa ka namtam ha ka 70 minit ban khur ïa ka jingjop.
Haba phai pat sha ka jingïakhun kaba khadduh, ka Laitkroh SC ka la jop da ka said ïa ka Them Rangshken ACC da tang shi kol. ïa kane ka kol la thep da u Ipaiaskhem Kharkongor (37min).
Ki jingïalehkai mynta ka sngi yn sdang naduh ka por 11:30 baje mynstep, ha SSA Ground, Polo, ha kaba ka New Challenger SC kan aireng pyrshah ïa ka Mawnianglah Youth SC.
Ka jingïakhun kaba ar kan long ha ka por 1:45 baje mynsngi hapdeng ka Mawpdang SC pyrshah ïa ka Mawlyngngad SC, bad kaba khadduh ha ka por 4 baje nohphaisngi hapdeng ka Umsohsun SC pyrshah ïa ka Madan S&CC.
