Shillong, Jylliew 30: Ki ar tylli ki jingïalehkai ka lympung SSA Fourth Division 2024 hynnin ka Sngi Saitjaiñ (29 tarik Jylliew, 2024) jong ka taïew ba ladep ha SSA Ground, Polo, ki la jam sha kaba kut ha kaba ka Them Rangshken ACC ka la khur ïa ka jingjop, katba ka Nongkolew SC bad ka Risa Colony SC ki la ïakhaid.
Haba phai sha ka jingïakhun kaba nyngkong, ka Nongkolew SC bad ka Risa Colony SC ki la ïoh ban khur mar shi point hadien ba ïakhaid mar 1 kol.
Ka Nongkolew SC ka la lamkhmat ïa ka jingïalehkai tang hadien 16 minit lyngba u Pynshailang Kharwanniang, hynrei ka Risa Colony SC ka la jubab da kaba pynïakhaid ha ka 29 minit lyngba u Riskhem Sten.
Lah ban kdew ba ka jingïakhun kaba ar, ka jingïalehkai ka la khlaiñ shiliang ha kaba ka Them Rangshken ACC ka la pynbam haduh 5 kol ïa ka Laitlulong SC ban khur pura ïa ki lai point.
Related Posts
U Gilbert Kurbah u la pynkhihjar ar sien na bynta ka kynhun, kawei ha ka 3 minit bad kaba ar ha ka 35 minit, nangta u Stabok Kurbah (24 min), Ivangari Kharphuli (62 min) bad u Batistar Langstieh (70 min) ki la ïoh ban thep mar kawei.
Ki jingïalehkai ka lympung SSA 4th Division 2024 mynta ka Sngi (01 tarik, Naitung, 2024) kan sdang ha ka por 1:45 baje mynsngi, ha SSA Ground, Polo, ha kaba ka Madanrting SC kan ïakhun pyrshah ïa ka Lumpyngngad SC, bud sa ka jingïalehkai ha ka por 4 baje hapdeng ka Lummawbah SC pyrshah ïa ka Mawkasiang SC, nangta ka jingïakhun ban long ha MFA Ground hapdeng ka Mawreng SC pyrshah ïa ka Umrynjah SC.