SHILLONG, Naitung 31: Ka Umrynjah SC ka la ïoh ban khur pura ïa ki lai point hynne ka sngi Palei hadien ba ka la pynliem noh ïa ka Lumparing SC da 3-1 kol ha kawei na ki jingïakhun jong ka lympung Third Division Football league 2025 ba la pynïaid da ka Shillong Sports Association, ha First Ground-SSA Stadium, Polo.
Ka Umrynjah ka la ïoh ban lamkhmat nyngkong ïa ka jingïalehkai ha ka minit kaba 15 jong ka kylla step lyngba u Banshemphang Nongkolew, hynrei u Imerial Jana (67’min) u la jubab ban pynïakhaid na bynta ka Lumparing ha ka kylla miet.
Ka la shimpor tang shi minit ïa ka Umrynjah ba kan wanphai biang ha ka jingkyrmen ban khur ïa ka jingjop lyngba ka kol na u Wanborlang Nongbri (68’min), bad hashwa ban kut ka por u Sainborlang Jyrwa (90+2’min) u la pynkhih ïa ka kol kaba lai ban pynskhem ïa ka jingjop.
Da kane ka namjop ka Umrynjah SC ka la pynthikna ïa ka jaka ban ïakhun ha ka quarter final da kaba jop lai sien lynter ki jingïalehkai.
Ka jingïalehkai ha kane ka sngi Thohdieng (01.08.2025) kan long hapdeng ka Imson SC pyrshah ïa ka Rynjah SC, ha ka por 1 baje mynsngi.
