Shillong, Nailar 18: Ka Madan SCC ka la pynjlan ïa ka jingïakhun jong ki sha ka semifinal ha ka lympung ïalehkai Third Division Football League 2025 jong ka Shillong Sports Association, da kaba pynliem noh ïa ka Umiew Maw U Sam da 3-1 ha ka jingïakhun quarterfinal kaba la long ha madan First Ground-SSA Stadium, Polo, ha ka Lah Sngi U Blei.
Ka Madan SCC ka la pynskhem ïa ka jingjop da kaba lamkhmat ar kol ha ka kylla step lyngba u Phermanbha Lyngdoh (27’minit) bad u Koijam Singh (29’minit).
Na ka liang jong ka Umiew Maw U Sam ka la pyrshang ban wanphai ha ka kylla miet da kaba aiti lut ban tur shakhmat. Kane ka la pynmong pynban ïa ki namar ba ka Madan SCC ka la ïoh ban thep sa ïa ka kol kaba lai lyngba u Mebakhraw Malieh ha ka minit kaba 89.
Watla kata ruh ka Umiew Maw U Sam ka la ïai pyrshang ban thaw ïa ki lad ban pynkhihjar, bad khatduh khatwai u Pynskhem Warlarpih (90’+1) u la pynïoh ïa ka kol ha ki minit pynjlan jong ka por shuwa ban wai.
Ka jingïakhun quarter final ha kane ka sngi Baar kan long hapdeng ka Mawkriah West SC pyrshah ïa ka Iatyllilang SC ha ka por 2:45 baje nohphai sngi.
