Shillong, Naitung 30: Ka Madan SCC ka la wanphai nadien ban pynliem ïa ka Kharang da 4-1 kol ha kawei na ki jingïalehkai jong ka lympung Third Division Football League 2025, ba la pynïaid da ka Shillong Sports Association, hynne ka sngi Balang ha madan First Ground-SSA Stadium, Polo.
Kane ka namjop ka la pynthikna ruh ïa ka Madan SCC ban ïa ka kyrdan ba nyngkong ha ka Group C bad ban ïoh rung sha ka wat ïakhun quarterfinal.
Ka kylla step ka la kut ha kaba ym shym la don ba lah ban pynkhihjar. Hadien katto katne minit u Robenson Warlarpih (50′) u la buh hakhmat ïa ka Kharang hynrei ka Madan SCC ka la wanphai da kaba tyngeh ban pynïakhaid bad pynbud sa lai tylli ki kol ban khur ïa ka jingjop, ha kaba u Thanggoulun Vaiphei (65′, 85′) bad u Phermanbha Lyngdoh (75′, 81′) ki la ïoh ban thep mar 2 kol.
Kane ka namjop kamut ba ka Madan SCC ka la kiew na ka kyrdan ba ar shakhlieh duh jong ka Group, da kaba tam ïa ka Iatyllilang, kaba dei kawei pat ka kynhun kaba la pynthikna ïa ka jaka ha ka quarter final na kane ka Group.
Ha kawei pat ka jingïalehkai jong kane ka sngi ha ka Group D, ka la kut ha ka jingïakhaid da mar 1-1 kol hapdeng ka Mawkriah West SC bad ka Umiew Maw U Sam. Baroh ar tylli ki kynhun ki ladep ban pynthikna ïalade ïa ka jaka ban ïakhun ha ka quarterfinal.
Ka long kumjuh ha kane ka jingïakhun ka kylla step ka la kut khlem don ba lah thep, hynrei u Bilistar Sun u la ai ïa ka Umiew Maw U Sam ïa ka kol lamkhmat ha ka minit kaba 47 jong ka kylla miet shuwa ba ka Mawkriah West kan pynïakhaid lyngba u Kiewdorlang Kyrsian (74′).
Ka jingïakhaid ka mut ba ka kyrdan jong ki kynhun ka neh kumjuh ha ka Group D, ha kaba ka Mawkriah West ka la wan hakhmat ban ïa ka Umiew Maw U Sam.
Ka prokram ïalehkai ha kane ka sngi Palei kan long hapdeng ka Umrynjah SC bad ka Lumparing SC, ha ka por 1 baje mynsngi, kiba na ka Group B.
