Shillong, Naitung 28: Ka Pomlakrai SC ka la khur ïa ka jingjop ha kawei na ki jingïalehkai jong ka lympung Third Division 2025 ba la pynïaid da ka Shillong Sports Association ha madan First Ground, SSA Stadium Polo, da kaba pynliem noh da 2-0 kol ïa ka Lawmali Pyllun SC.
Kawei pat ka jingïalehkai jong kane ka sngi hapdeng ka Lumparing SC bad ka Umlyngka SC ka la kut ha ka jingïakhaid.
Haba phai sha ka jingïalehkai kaba nyngkong, u Nathaniel Marbaniang (25 minit) bad u Macdonald Kurkalang (45’+2 minit) ki la pynkhih ïa ki ar tylli ki kol na ka bynta ka Pomlakrai SC, kaba la pynthikna ïa ka kynhun ban khur ïa ka jingjop kaba nyngkong ha ka Group A.
Da kane ka namjop kamut ba ka Pomlakrai ka la kiew na trai sha khlieh duh jong ka Group, haba kheiñ katkum ka jingïakhun ba ïakynduh pyrshah (head to head) kaba ki don mynta ïa ka Lawmali, ha kaba ka jingïapher kol jong ki kynhun ha kane ka Group ka long da tang 0.
Hynrei kane kam shym la pynthikna ïa ka Pomlakrai lane ka Lawmali ïa ka kyrdan ban wan ha ka thup Top 2. Kane ka dei ka jingïalehkai ba khatduh jong kine ki arliang mamla, katba kiwei pat ki lai tylli ki kynhun ki dang don ar tylli ki jingïalehkai ban pyndep.
Ha ka Group B, ka jingïakhaid ka la biang ïa ka Umlyngka ban knieh ïa ka kyrdan ba nyngkong na ka Umrynjah, watla ka Umrynjah ka dang sah sa kawei ka jingïalehkai.
Ha kane ka sngi Ba ar kan don tang kawei ka jingïalehkai, ha ka Group A , ha kaba ka Nongumlong kan aireng pyrshah ïa ka Sanmer ha ka por 1 baje mynsngi.
