SSA 3rd Div 2025: Thep u Balviky ïa ka hat-trick ba nyngkong

Shillong, Naitung 21: Ka Umrynjah SC ka la jop ïa ka jingïalehkai ba nyngkong jong ka ha ka lympung ïalehkai phutbol kyrdan Third Division 2025 ba la pynïaid da ka Shillong Sports Association ha madan First Ground-SSAStadium, Polo, hynne ka sngi Nyngkong da kaba pynliem noh ïa ka Rynjah SC da 5-2 kol.
Ha kane ka jingïalehkai la ïoh ruh ban sakhi ïa ka hat trick kaba nyngkong kaba la thep da u Balviky Margnar (44′, 63′, 90’+2’min) na bynta ka Umrynjah.
Kumjuh ruh ha ka Group B, ka Lumparing SC ka la pynliem ïa ka Imson SC da kaba jop da 3-2 kol katba ha ka Group C ka Iatylli SC ka la pynliem ïa ka Gorkha Association da 2-1 kol.
Ha ka jingïalehkai kaba nyngkong u Wanborlang L Nongbri (2’min) u la pynkhih ïa ka kol kaba kloi tam mynta ka samoi na bynta ka Umrynjah shuwa ba ka Rynjah SC kan jubab da kaba pynïakhaid lyngba u Venquish Pohlong (24’min).
U Balviky u la pynkhih ïa ka kol kaba nyngkong jong u ha ka 44 minit shuwa ban kut ka kylla step ban buh biang hakhmat ïa ka Umrynjah.
Ka jingïalehkai ka la ïakhaid biang ha ka minit kaba 51 hadien ba u Medonbanshan Mylliemngap u la pynkhih ïa ka kol kaba ar na bynta ka Rynjah. Hynrei ka Umrynjah ka la pynskhem ïa ka jingjop da kaba thep sa lai tylli ki kol, ha kaba ar tylli la thep da u Balviky (63 & 90+2min) ban kynjoh syndon ïa ka hat trik, katba kawei pat kaba la kum thep hi da u rangïalehkai ka liang pyrshah, u Max Khongsit (68’Own goal).
Ha ka jingïalehkai kaba bud, u Kyrpanglang Mawlong (59′) u la pynkhih ïa ka kol kaba nyngkong na bynta ka Lumparing hynrei ka Imson, ka la wanphai da kaba tyngeh ban pynïakhaid lyngba u Bosil Thabah’s (64′).
Hadien katto katne sien ba la pyrshang khatduh u Joslang Lyngkhoi u la ïoh ban pynkhih ïa ka kol ha ka minit kaba 67 ban pynlamkhmat biang ïa ka Lumparing.
Hynrei sa shi sien pat ka Imson ka la ïoh biang ban pynïakhaid, mynta ka kynti ka dei ka ha ka minit kaba 87 lyngba u Fidel Nongkhlaw.
Wat hadien kane ka Imson, kam shym la lah satia ban pynthikna ïa ka point bad ban khanglad ïa ka liang pyrshah namar ha ka khyllipmat shuwa ban kut ka Lumparing ka la wanphai biang ban lamkhmat lyngba u Sholinstar Syngkli (90’+3) bad khur syndon ïa ka jingjop.
Ka jingïalehkai ba khatduh jong kane ka sngi la sakhi ïa ka Iatylli SC kaba la pynliem ïa ka Gorkha Association da 2-1 kol. U Joinborlang Kharumnuid (8′) bad u Iatyllibor Mynsong (73′) ki la thep na bynta ka Iatylli, katba u Yash Kanwar (67′) u la pynphai na bynta ka Gorkha Association.
Ka jingïalehkai mynta ka sngi kan long hapdeng ka Laitlyngkot pyrshah ïa ka Lamlynti Madanlyngkhi, ha ka por 10 shiteng mynstep.