Shillong, Naitung 14: Ka Shillong Sports Association ka la ïoh ban jam shakhmat ban sdang ïa ka lympung ïalehkai Third Division 2025 hynne ka sngi Nyngkong (14 tarik Naitung, 2025), ha kaba ka jingïalehkai kaba nyngkong jong kane ka samoi ka la kut ha ka jingïakhaid, ha madan First Ground-SSA Stadium, Polo.
Ka jingïalehkai ha ka sngi sdang ka la long hapdeng ka Sanmer bad ka Lawmali Pyllun kiba na ka Group A, kiba la ïasam mar shi point naba ïakhaid da mar kawei (1-1).
Hadien ba ka Sanmer ka la sdang ha ka rukom kaba kham khlaiñ ka la ïoh ban lamkhmat ïa ka jingïalehkai lyngba u Kamkynti Pahsyntiew (11′).
Related Posts
Lah ban kdew ba ka Sanmer ka la ïoh ban tehlakam bun shah ïa ka bol katba ka Lawmali Pyllun ka la ïoh tang khyndiat tylli ki kabu ksiar. Watla kata ruh, ka Lawmali Pyllun kam shym la pynsyrwa kai ïa ki kabu ba ka ïoh, bad ha ka minit kaba 34 u kapten jong ka kynhun u Derick Syiemlieh u la pynïakhaid ïa ka jingïalehkai.
Watla ki don katto katne ki kabu hynrei ka jingïalehkai ka la neh kumjuh haduh kaba kut jong ka por da mar 1-1 kol, kaba mut ba baroh arliang ki la hap ban ïasam mar shi point na kane ka jingïalehkai.
Ka jingïalehkai mynta ka sngi kan long biang na ka Group A, ha kaba ka Madanrting kan aireng pyrshah ïa ka Pomlakrai, ha ka por 10 shiteng mynstep.