Shillong, Nailar16: Ka Nongumlong SC bad ka Mawryngkneng SC ki la khur jingjop ha ki jingïalehkai ba la long ha ka Sngi Thohdieng jong ka lympung Third Division 2024 ba la pynïaid da ka Shillong Sports Association ha madan SSA Ground, Polo.
Na ka liang jong ka Nongumlong ka la khur ïa ki lai point ba kongsan hadien ba ka la pynliem noh ïa ka Lapalang SC da 3-1.
Dei lyngba u Riskhem khriam ba ka Nongumlong ka la ïoh ban lamkhmat ïa ka jingïalehkai na ka kol ba la thep ha ka 19 minit, hynrei u Sonjalen Haokip u la pynïakhaid ïa ka jingïalehkai na bynta ka Lapalang ha ka minit ba 38.
Watla kata ruh, kane kam shym la pyllait ïa ka kynhun na ka namrem naba u Marquis Myrthong u la khyrwit ar tylli ki kol ha ka 71 bad 77 minit ban pynthikna ïa ka Nongumlong ban khur shalade ïa ki lai point ba kongsan.
Katba ka jingïakhun kaba ar, la sakhi ïa ka Mawryngkneng SC kaba la pynliem noh ïa ka Pomlakrai SC da 3 kol. Ha kane ka jingïalehkai la sakhi ruh ïa ar kol ba la thep da u Iohbor Mukhim (26 , 33 minit), katba ka shi kol ka la wan na u Rishot Sari ha ka 65 minit.
Ki jingïakhun kiba bud jong kane ka lympung kan bteng biang ha ka 19 tarik mynta u Nailar hapdeng ka Mawpat SC bad ka Iaityllilang SC na ka Group B ha ka por 12:45 baje mynsngi, kaba long shuwa ka Semi final kaba ar jong ka kyrdan Fourth Division hapdeng ka Madanrting SC bad ka Madan SCC ha ka por 3:45 baje nohphaisngi.
