Shillong, Nailar 28: Ka Umphrup SC bad ka Sohryngkham SC ki la jop ïa la ki jong ki jingïalehkai jong ka lympung Second Division Football League 2025 ba la pynïaid da ka Shillong Sports Association ha madan First Ground-SSA Stadium, Polo, hynne ka sngi Palei.
Baroh ar tylli ki kynhun ki la jop ha ka rukom kaba shongkun. Ka jingïalehkai kaba nyngkong la sakhi ïa ka Umphrup kaba la pynliem noh da 4-0 kol ïa ka PFR Academy, katba ka Sohryngkham ka la jop da 4-1 kol ïa ka Sohiong SC.
U Nangshemlang Wahlang u la noh synñiang borbah ïa ka Umphrup ban khur ïa ka jingjop da kaba thep ar tylli ki ha ka minit kaba 10 bad 35, katba u Barrister Kharkongor (5′) bad u Damanglang Kharbyngar (50′) ki la thep mar kawei.
Ha ka jingïalehkai kaba bud, u Pynshongdor Pyngrope (13′, 51′) u la noh synñiang da kaba thep ar tylli ki kol na ka bynta ka Sohryngkham, nangta kiar tylli kiwei pat ki kol la thep da u Kyrshanglang Kshiar (16′) bad u Mebankyrshan Kharpran (69′). U Balipskhem Wahlang (66′) u la pynphai shi kol na ka bynta ka Sohiong.
Hadien kane ka Umphrup, Sohryngkham bad ka Mawryngkneng ki la kamai mar 4 point da tang ka jingïapher kol (goal difference) kaba +4, +3 bad +2 marïabud, kaba pynïakhlad ïa ki ha ka Group C. Ka PFR ka bud nadien da 3 point bad ka Tynring (1) bad ka Sohiong (0).
Ki jingïalehkai ha kane ka sngi Thohdieng, ha ka por 11:15 baje mynstep ha ka Group B ka Marbisu SC kan ïakhun pyrshah ïa ka Laitkyrhong SC, nangta bud sa ha ka por 1:45 baje mynsngi ha ka Group A hapdeng ka Umpling SC bad ka Lumshyiap SC.
