SHILLONG, Risaw 07: Ka Mylliem Lum SA bad ka PFR FA ki la ïoh ban khur jingjop ha ka lympung lehkai Second Division 2024 jong ka Shillong Sports Association, ba la long ha ka Lah Sngi U Blei (07.10.2024) ha SSA Ground, Polo.
Ha ka jingïakhun kaba nyngkong, la sakhi ïa ka Mylliem Lum ka la pynjemkhnap ïa ka Lumshyiap SC da 5 kol.
Kine ki san kol na ka Mylliem Lum SA la pynkhih da san ngut ki rangïalehkai, ba kynthup ïa u Arbun Sing Warjri (12 min), u Lambor Sing Nongdhar (42 min), u Eliastar Nongsiej (45+2min), u Rapborlang Jana (63min) bad u Bhakupar Rynjah (70 minit).
Katba ka jingïakhun kaba ar, ka kynhun ïalehkai jong ka PFR FA ka la lah ban wanphai nadien ban jop da 2-1 kol ïa ka Laitlyngkot SC.
Ha ka jingïalehkai, ka Laitlyngkot SC ka la ïoh ban lamkhmat hadien 14 minit ba la ïaid ka por lyngba ka kol na u Melambha Shabong, hynrei kam shym la shimpor ïa ka PFR FA ban jubab. Ha kaba kane ka kynhun ka la pynïakhaid ha ka minit ba 19 lyngba u Endy Suting.
Hadien ba ïakhaid da mar shi kol ha ka kylla step, ka PFR FA ka la ïoh ban thep pat sa ïa ka kol kaba ar ha ka 77 minit lyngba u Shanbor Thangkhiew ban khur shalade ïa ka namjop.
Ki jingïalehkai ha kane ka Sngi Hat Majai (08.10.2024) kan long ha ka kyrdan ïalehkai SSA First Division, ha kaba ka jingïalehkai kaba nyngkong kan long ha ka por 12 baje mynsngi hapdeng ka Mylliem SC pyrshah ïa ka Mawkhar SC, nangta kaba ar ha ka por 2:45 baje nohphaisngi hapdeng ka Malki SC pyrshah ïa ka Lawsohtun SC.
