Shillong, Nailar 20: Ka Laitkyrhong SC ka la ïoh ban khur ïa ka jingjop da kaba pynliem noh ïa ka Umphyrnai SC da 2-1 kol ha kawei na ki jingïalehkai jong ka Second Division Football League 2025 ba la pynïaid da ka Shillong Sports Association ha madan First Ground-SSA Stadium, Polo, hynne ka sngi Balang.
Shuwa kane, ka jingïalehkai hapdeng ka Nongmensong SC bad ka Marbisu SC ka la kut da kaba ïasam mar shi point naba ïakhaid da mar 1-1 kol.
Ka Laitkyrhong SC ka la khur pura ïa ki lai point lyngba ki ar tylli ki kol ba la thep da u Joinborlang Nongspung (9’minit) bad u Learning Warlarpih (24’minit), katba u Shemjingmut Kharmyndai u la pynphai ïa ka shi kol na ka bynta ka Umphyrnaiha ka minit kaba 16 ban pynïakhaid shi por ïa ka jingïakhun.
Ha kawei pat ka jingïalehkai, dei ka Marbisu kaba la ïoh lamkhmat nyngkong lyngba ka kol jong u Banlamshwa Jyrwa ha ka minit kaba 34, hynrei ka Nongmensong ka la pynïakhaid tang mar ïasdang ka kylla miet lyngba u Kevin Diengdoh (49′).
Ka jingïalehkai ha kane ka sngi Palei kan sdang ha ka por 11:15 baje mynstep hapdeng ka PFR Academy pyrshah ïa ka Tynring SC, nangta bud sa ka jingïakhun hapdeng ka Sohryngkham SC bad ka Umphrup SC, ha ka por 1:45 baje mynsngi.
