Shillong, Nailur 03: Ka Mawpat SC ka la bteng ïa ka jingïaid lynti kaba paka jong ka mynta ka samoi da kaba jop 3-0 kol ïa ka Jongksha ha kawei na ki jingïalehkai jong ka lympung Second Division Football League 2025 ba la pynïaid da ka Shillong Sports Association ha madan First Ground-SSA Stadium, Polo, hynne ka sngi Balang.
ïa kine ki kol la thep da lai ngut ki rangïalehkai bapher bapher jong ka Mawpat, ha kaba ka la ïoh ban lamkhmat ïa ka kylla step da shi kol lyngba u Wanlambor Masynting uba la pynkhih ïa ka jar ha ka minit kaba 36.
Haba jam sha ka kylla miet, ka Mawpat ka la pynskhem ïa ka jingjop da kaba thep sa ar tylli ki kol, kawei ka la wan hadien katto katne por lyngba u Thompson Lyngdoh (59′).
Bad ka kol kaba lai bad kaba khatduh ka la wan hapoh ki 2 minit ba khatduh jong ka jingïalehkai lyngba u Kardilius Kharkongor (88′).
Ka prokram ïalehkai jong ka lympung SSA Second Division Football League 2025 ha kane ka sngi Palei (04.09.2025) kan sdang ha ka por 11:15 baje mynstep, ha kaba ka Nongmensong SC kan aireng pyrshah ïa ka Umphyrnai SC, nangta ha ka por 1:45 baje mynsngi ka Smit SC kan aireng pyrshah ïa ka Marbisu SC.
