Shillong, Nailur 07: Ka Tynring SC bad ka Mylliem Lum SC ki la jop ïa la ki jong ki jong ki jingïalehkai jong ka lympung Second Division Football League 2025, ba la pynïaid da ka Shillong Sports Association, kiba la long ha ka sngi Saitjaiñ ha madan First Ground-SSA Stadium, Polo.
Ka Tynring ka la jop da 3-2 kol ïa ka Umphrup SC ha ka jingïakhun kaba ïaryngkat bor, katba ka Mylliem Lum ka la pynjem khnap ïa ka Umpling da 4-0 ha ka jingïalehkai kaba bud.
Haba phai sha ka jingïalehkai kaba nyngkong, u Jovinal Mylliempdah (30′) bad u Bakmenkordor Mylliem (35′) ki la buh hakhmat ïa ka Tynring da kaba thep ar tylli ki kol ha ka kylla step.
Ka Umphrup ka la ïohlad ban pynphai kawei lyngba u Shariwell Lyngdoh ha ka minit kaba 66, hynrei u Hasken Roy Kharsati u la pynjlan biang ar shah ïa ka kol lamkhmat na ka bynta ka Tynring da kaba thep ïa ka kol kaba lai ha ka 73 minit.
Tang hadien 2 minit u Shariwell Lyngdoh (75’) u la thep biang sa kawei ka kol hynrei ka por ka la lyngkot eh ïa ka kynhun ban wanphai bad ka la hap ban mad ïa ka nam rem.
Haba phai sha ka jingïakhun kaba ar, baroh saw tylli ki kol jong ka Mylliem Lum ki la wan ha ka kylla miet. U Arbunsing Warjri (70 & 80’) u la ïoh ban thep ar tylli ki kol, nangta kiwei pat la thep da u Sbinstar Jana (64′) bad u Lestarwell Khyriem (83′).
Ka jingïalehkai jong ka SSA Second Division Football League 2025 ha kane ka sngi Nyngkong kan sdang ha ka por 1:30 baje mynsngi hapdeng ka Laitkyrhong bad ka Nongmensong.
