SHILLONG, Nailar 18: Ka Jongksha SC ka la ïoh ban sdang da ka jingjop ha ka lympung ïalehkai phutbol jong ka kyrdan Second Division Football league 2025 ba la pynïaid da ka Shillong Sports Association, da kaba pynliem noh ïa ka Umpling SC da 2-0 kol hynne ka Lah Sngi U Blei ha madan First Ground-SSA Stadium, Polo.
Ka jingïakhun ka long kaba ïakhaid bad kaba ïaryngkat bor ha kaba ym shym la don ba lah ban pynkhihjar ban pynïakhlad ïa ka jingïakhaid ha ka kylla step. Ka jingbym lah thep kol ka la bteng bad neh shi slem wat ha ka kylla miet.
Hynrei ha ka por ba ym shym la poi pyrkhat, ka Jongksha ka la thep ïa ar tylli ki kol ban pynthikna ïa ka jingjop. Kine ki kol la thep marïabud kawei hadien kawei da u Wankambok Karsahnoh (84’min) bad u Iohborlang Nonglyer (89’min).
Ka jingïalehkai jong ka SSA 2nd Division Football league 2025 ha kane ka sngi Baar kan sdang ha ka por 12:15 baje mynsngi hapdeng ka Mylliem Lum SC pyrshah ïa ka Lumshyiap SC.
