SHILLONG, Naiwieng 19: Ka Ryntih SC ka la khur ïa ka jingjop da kaba pynliem 2-0 ïa ka Mawkhar SC ha ka jingïalehkai ka lympung First Division Football league 2025 jong ka Shillong Sports Association (SSA) kaba la long hynne ka sngi ha madan First Ground, SSA Stadium, Polo.
Ka Ryntih SC ka la pynkhihjar ha baroh ar tylli ki kylla jong kane ka jingïakhun, ha kaba u Banlam Nashwa Kharbhih u la thep ïa kaba nyngkong tang hadien 10 minit ba la ïaid ka kylla step, nangta u Russel C L Nongkynrih u la pynskhem ïa ka jingjop da kaba pynkhih ïa ka kol kaba ar ha ka 73 minit.
Ha kane ka sngi Palei (20.11.2025) kan don kawei ka jingïalehkai ha ka SSA 1st Division Football league 2025 ka ban sdang ha ka por 2 baje nohphai sngi, ha kaba ka Lawsohtun SC kan aireng pyrshah ïa ka Nongkrem SC.
