SHILLONG, Naiwieng 09: Ka Pohkseh SC ka la ïoh ban khur ïa ka jingjop kaba ar jong ka ha ka lympung phutbol First Division Football league 2025 jong ka Shillong Sports Association, hadien ba ka la pynliem noh ïa ka Lawsohtun SC da 3-2 kol ha ka jingïalehkai kaba la long ha ka sngi saitjaiñ ha madan First Ground-SSA Stadium, Polo.
Baroh lai tylli ki kol jong ka Pohkseh ki la wan ha ka kylla step, ha kaba u Mark O Wanswett (9 & 18’) u la pynkhihjar ar sien tang hapoh 20 minit ba la sdang ka jingïalehkai shuwa ba u Shanbor Jyrwa (21’) un pynphai kawei na ka bynta ka Lawsohtun.
Hynrei shiphew minit shuwa ba ka jingïalehkai kan jam sha ka por shongthait u Jonewest Mawiong (35’) u la pynjlan ïa ka kol lamkhmat da 3-1 na ka bynta ka Pohkseh.
Ha ka kylla miet u Shanbor (72’) u la ïoh ban pynkhihjar biang sa shi sien na ka bynta Lawsohtun kaba la pynduna ïa ka kol lamkhmat jong ka liang pyrshah da 3-2, hynrei ka por ka la lyngkot eh ïa ka kynhun ba kan wanphai ban pynïakhaid ïa kane ka jingïalehkai.
Ka jingïalehkai jong ka SSA 1st Division Football league 2025 ha kane ka sngi Nyngkong (10.11.2025) kan sdang ha ka por 1:15 baje nohphai sngi, ha kaba ka Nongkrem SC kan aireng pyrshah ïa ka Mawkhar SC, nangta ha ka por 4:15 baje janmiet ka Nongthymmai SC kan ïakhun pyrshah ïa ka MLP FT.
