Shillong, Naiwieng 23: Ka Nongkseh SC ka la ïoh ban pynthikna ïalade kum ka lahduh ha ka lympung phutbol First Division Football League jong ka Shillong Sports Association, da kaba pynliem noh ïa ka Meghalaya Police da 1-0 kol ha ka jingïakhun ba khatduh jong ka aïom ïalehkai u snem 2025, kaba la long ha ka janmiet jong ka sngi Saitjaiñ ha madan First Ground-SSA Stadium, Polo.
Kane ka resol ka la pynjlan ruh ïa ka jingjop ba paka jong ka Nongkseh mynta ka aïom lehkai, da kaba jop ïa baroh 9 tylli ki jingïakhun ban rah ïa ka nam lahduh. Lah ban kdew ruh ba kane ka jingïalehkai ka la long kaba shongshit tam ba baroh ha ka First Division namar ka jingbun u paid kiba la pyndap ïa ki jaka shong, naduh ki nongkyrshan ka Nongkseh bad kumjuh ruh ka kynhun ki pulit jong ka MLP.
Shuwa ban jam sha kane ka jingïakhun, baroh ar liang ki la bteng ïa ka jingjop ba paka (100%) da kaba jop ïa baroh 8 tylli ki jingïalehkai ba ladep kaba la pynlong ïa ki ban synshar naduh ba sdang ïa ka thup kyrdan Top-2 ha ka miej. Watla ka jingïakhur poiñ ka ïaryngkat da mar 24 poiñ, hynrei ka Nongkseh ka ïoh ban lamkhmat ha khlieh duh jong ka miej namar ka don ïa ka jingïapher kol (goal difference) kaba kham bha haba ïanujor bad ka MLP FT. Kumta ka MLP ka donkam ban jop khnang ban ïohrah ïa ka nam lahduh, katba ka Nongkseh ka donkam tang ïa ka jingïakhaid.
Haba phai sha ka jingïakhun, ka Nongkseh ka la ïoh ban pynkhihjar lyngba u Hardy Cliff Nongbri tang hadien 6 minit ba la ïaid ka kylla step (kaba dei artad ka namtam kaba rai ïa lahduh).
Ka MLP ka la durut tyngeh bha hynrei kam shym la lap satia ïa ka lad ban ïaid lait ïa ka Nongkseh haduh kaba kut jong ka por ba la mang. Kane ka la pynlong ïa ka MLP ba kan mad ïa ka jingshah rem kaba nyngkong ha kane ka samoi.
Ha ka jingïalang sam khusnam, u Pynshailang Lyngkhoi jong ka MLP FT u la ïohpdiang ïa ka khusnam ‘Top Scorer’ da kaba thep 9 kol naki 8 tylli ki jingïalehkai.
Kum ka lahduh ka Nongskeh ka la ïoh khur ïa ka khusnam pisa kaba T.2 lak ryngkat ka trophy, katba ka MLP ka la ïohpdiang ïa ka khusnam pisa kaba T. 1 lak kum ka kynhun kaba wan ba-ar (runners-up).
Baroh ar tylli ki kynhun kin kiew kyrdan sha ka Shillong Premier League ha u snem ban wan. Na ka bynta ka MLP FT kadei ka jingwanphai biang sha kane ka kyrdan ïakhun naduh ba ki la shah pynhiar kyrdan ha u snem 2018, katba ïa ka Nongkseh kan dei ka sien kaba nyngkong.
Da ka jingpynkut noh ïa ka SSA 1st Division Football league 2025, baroh ki khmat kin phai mynta sha ka SSA Champions Cup kaba nyngkong, ha kaba ka Nongkseh bad ka MLP ruh kin ïa shim bynta. Kum ka lahduh ka Nongkseh kan shah kynthup ha ka Group B bad ka MLP ha ka Group A.
