SSA 1st Division 2025: Pynjemkhnap ka Nongkseh ïa ka Pohkseh da 6 kol; ïoh hat trik u Chesterpaul

Shillong, Risaw 04: Ka Nongkseh SC ka la khur ïa ka jingjop da kaba suk pyrshah ïa ka Pohkseh SC ha kawei na ki jingïalehkai jong ka lympung First Division Football League 2025 jong ka Shillong Sports Association, kaba la long ha ka sngi Saitjaiñ, 04 tarik Risaw, ha madan First Ground-SSA Stadium, Polo.
U Chesterpaul Lyngdoh u la ai mynsiem ïa ka Nongkseh ban jop suk da 6-0 kol da kaba thep ïa ka hat trick (48, 60′, 84′), kaba nyngkong na kine ki lai tylli ki kol ka la wan lyngba ka penalty. Ki lai tylli kiwei pat ki kol la noh synñiang da u Hardy Cliff Nongbri, uba la thep ar kol (75′, 90’+1) nangta bad u Shano Tariang, kawei ka kol (24’).
Ha u snem ba ladep ka Nongkseh ka la thrang bha ban kiew kyrdan sha ka Shillong Premier League, hynrei kam shym la lah satia, ha kaba ka la pynkut ïa ka aïom lehkai First Division jong u snem 2024 ha ka kyrdan ba saw.
Mynta u snem ka paw shai ba ki nongpynïaid jong ka klob (Nongkseh SC) ki la shimkhia bha ban pynkhlaiñ ïa la ka jong ka kynhun da kaba soi bun ngut ki nongïalehkai kiba kynsai; ha kaba katto katne ngut na ki, ki la ïalehkai ha ka I-League.
Ka jingïalehkai jong ka SSA First Division Football League 2025 ha kane ka sngi Nyngkong, 06 tarik Risaw, kan sdang ha ka por 1:30 baje mynsngi, ha kaba ka Mawkhar SC kan aireng pyrshah ïa ka Meghalaya Police.